Zabuli 75 - Biblia Kikutu

ZABULI YA 75

(Lwila na Zabuli ya Asafu. Kwa kilanja, yatumie modeli wa, “Sikuubanange.”)

¹ Gweye Imulungu, tokushukulu, tokushukulu gweye kwavija twaga jako da behi, wanhu osimulila mbuli zako za unzonza.

² Imulungu kolonga, “Nosagula kipindi kinogile, niye notagusa kwa haki.

³ Kipindi isi yose na iwanhu okala mumo yahatigisika, niye ayo nigogeleza mhanda zake sikuzilagale.

⁴ Kwa iwanhu oitapa nolonga, ‘Sikumuitape kabili,’ kwa iwanhu wehile nolonga, ‘Sikumwinule mhembe zenu.

⁵ Sikumwinule mhembe zenu mbuli ya ulanga, sikumulonge kwa kibuli.’ ”

⁶ Haduhu yoyose yolawa umwambu wa kudilawila zuwa, hebu umwambu wa kudihongela zuwa, hebu umwambu wa kuluwala yodaha kumkweza munhu.

⁷ Lakini Imulungu ayo yotagusa, komuhumulusa imoja na komkweza iyagwe.

⁸ Mumkono wa Mndewa Imulungu kuna kikasi kimemile divai kali, yolava holovu na ihanganyigwa na usongo, kowagidila iwanhu wehile weli mwiisi, ong'wa mbaka dwendwe da mwisho.

⁹ Lakini niye nolonga gayasang'hane milele, nomwimbila nhogolwa Imulungu wa Yakobo.

¹⁰ Nguvu za iwanhu wehile nozibena, lakini nguvu za wene haki zokwinuligwa.