Zabuli 64 - Biblia Kikutu

ZABULI YA 64

(Kwa kilanja, Zabuli ya Daudi.)

¹ Unhegeleze gweye Imulungu, kuiyalala kwangu, ukalize ugima wangu kwa awo onihila.

² Unifise kulawa kwa awo wehile ogelegeza vihile, unike kutali na mting'hano wa iwanhu otenda gehile.

³ Onola milimi yao kamba sime, olava mbuli za usede kamba misale.

⁴ Kulawa kuko kuwaifisile wamvamila munhu yelibule kitala, omvamila kwa kusinhukiza bila kudumba.

⁵ Opanga kinhu kimoja kwa magesa gao gehile, oilumba hanhu ha kufisa mitego yao. Ogelegeza, “Haduhu yodaha kuyona.”

⁶ Otenda njama zao na kulonga, “Tumambukiza mpango uno, nani yojuwa kinhu kino?” Mipango ya kifiso ifisigwa mmoyo wa munhu.

⁷ Lakini Imulungu kowatowa kwa misale, na bahaja olagazwa hasi.

⁸ Kowabananga kwa mbuli zao wenyego, wose onda wawone ominula milomo yao kwa kuwabezeli.

⁹ Aho iwanhu wose odumba, ogasimulila gayatendile Imulungu, na ogagelegeza gaja gayatendile.

¹⁰ Wanhu wanogile wadeng'helele kwa Mndewa Imulungu, na wamkimbilile heyo. Wanhu wose wanogile omtogola heyo.