Zabuli 61 - Biblia Kikutu

ZABULI YA 61

(Zabuli ya Daudi. Kwa kilanja, yatumie nyuzi za bango.)

¹ Gweye Imulungu utegeleze kililo changu, uhulike kupula kwangu.

² Kulawa kuuhelelo wa isi nokukema gweye, moyo wangu uhasinduka, nilongoze hanhu heli na tindiwalo kamba kudibwe dili tali kubanza niye,

³ kwavija gweye ayo kimbililo jangu, gweye ayo ngome yangu na kowagomesa iwanhu onihila.

⁴ Leka nikale mkibanda chako milele. Leka nikimbilile hana imbeho ya mabawa gako.

⁵ Kwavija gweye Imulungu kuhulika kuiduwila kwangu, kunigwaa uhazi hamoja na awo okudumba gweye.

⁶ Umgwelele mndewa siku nyingi, miyaka yake iwe kwa ulelo mwingi.

⁷ Yatawale milele kuulongozi wako gweye Imulungu. Lagiza unogelo wako hawishaga na kutamanilwa kwako vimkalize.

⁸ Avo niye nodimbila nhogolwa twaga jako, nogavikiza gaja ganiiduwile kila siku.