Zabuli 28 - Biblia Kikutu

ZABULI YA 28

(Zabuli ya Daudi.)

¹ Nokulilila gweye Mndewa Imulungu! Gweye dibwe da ugima wangu, sikuuwe kamba mvugu kumwangu. Kamba hunitegeleza, nokuwa kamba iwanhu ochola kudisimo da kuzimu.

² Utegeleze kililo changu, unyonele bazi nahakukema unitaze, nahenula makono gangu ako kuing'anda yako ing'ala.

³ Sikuunitupe hamoja na iwanhu wehile, hamoja na iwanhu otenda gehile. Iwanhu awo olonga na wayao mbuli zinogile, kumbe wamema gehile mmizoyo yao.

⁴ Walihe kamba viwasang'hane na kamba viwatendile gehile, wagwelele kamba sang'hano ya makono gao viili, uwalihe gaja golondigwa.

⁵ Hewo hawaigelegeza isang'hano ya Mndewa Imulungu, hebu sang'hano ya makono gake, kwa mbuli ayo kowabomola, na hawazenga kabili.

⁶ Yatogolwe Mndewa Imulungu, kwavija kahulika kupula kwangu.

⁷ Mndewa Imulungu ayo nguvu zangu na ngao yangu, niye nomtamanila heyo. Heyo kanitaza na niye nodeng'helela kwa moyo wangu, kwa lwila lwangu nomshukulu.

⁸ Mndewa Imulungu ayo nguvu ya wanhu zake, heyo ayo yokimbililwa na mndewa iyamsagule.

⁹ Imulungu uwakombole wanhu zako, uwatende wamwede iwanhu awo weli wako. Uwasusile na kuwataza milele.