Zabuli 26 - Biblia Kikutu

ZABULI YA 26

(Zabuli ya Daudi.)

¹ Mndewa Imulungu, uwalihe, kwavija nikala bila kitala, nikutamanila gweye bila kunyawanyawa.

² Unigeze na kunipima gweye Mndewa Imulungu, uulole moyo wangu na nzewele zangu.

³ Unogelo wako hawishaga wa kuulongozi wa meso gangu, nokala mbuli ya kukutamanila.

⁴ Sikala na wanhu wavizi, sikala na wanhu watapitapi.

⁵ Noihila miting'hano ya iwanhu wehile, na sikala na iwanhu wehile.

⁶ Go Mndewa Imulungu, nonawa makono gangu kulagusa sitendile dihile, nouzunguluka upango wako wa nhosa.

⁷ Nokwimba lwila lwa kukutogola gweye, nosimulila sang'hano zako zose za unzonza.

⁸ Mndewa Imulungu, nonogezwa na ng'anda yako aho houkala, aho houkala ukulu wako.

⁹ Sikuunibanange hamoja na wene nzambi, na sikuunitupe hamoja na awo iwakomaji,

¹⁰ iwanhu awo watendaga gehile siku zose, iwanhu wamemile hongo.

¹¹ Lakini niye nokala kwa moyo unogile, unyonele bazi na unikombole.

¹² Niye nima wima hanhu helibule magazo, nomtogola Mndewa Imulungu mumting'hano mkulu.