Zabuli 20 - Biblia Kikutu

ZABULI YA 20

(Kwa kilanja, Zabuli ya Daudi.)

¹ Mndewa Imulungu yakwidike mna isiku ya magazo. Twaga da Imulungu wa Yakobo dikukalize.

² Yakutaze kulawa hanhu hong'ala, na yakutaze kulawa kulugongo lwa Sayuni.

³ Yazikumbuke sadaka zako zose, na yazitogole nhosa zako za kusoma moto.

⁴ Yakugwee gaja goulonda mmoyo wako, na ugavikize gose gougelegeza kutenda.

⁵ Todeng'helela kwa ukombola wako, tokwinula bendela kuditogola twaga da Imulungu wetu. Mndewa Imulungu yakugwee gose guupula.

⁶ Nojuwa Mndewa Imulungu komkombola imndewa iyamsagule, komwidika kulawa hanhu hong'ala ako kuulanga, kwa mkono wake wa kudila komgwaa mhumo.

⁷ Iwanhu wayagwe oitapa kwa mituka ya ng'hondo, na iwanhu wayagwe oitapa kwa falasi wao. Lakini siye toigodela Mndewa Imulungu, Imulungu wetu.

⁸ Hewo oikwala na kugwa, lakini siye tokwinuka na kwima.

⁹ Gweye Mndewa Imulungu, umuhonye imndewa! Utwidike twahakukema.