Zabuli 140 - Biblia Kikutu

ZABULI YA 140

(Kwa kilanja, Zabuli ya Daudi.)

¹ Go Mndewa Imulungu, ung'hombole na wanhu wehile, unikalize na wanhu wasede,

² awo opanga gehile mmizoyo yao, oding'hula ndwagi siku zose.

³ Milimi yao oitenda mikali kamba zoka, sumu ya futa ya mmilomo yao.

⁴ Go Mndewa Imulungu, unihonye na makono ga wanhu wehile, unikimile na wanhu wasede, wapangile kunigwisa.

⁵ Weli na kibuli wanitegela mitego kwa kifiso, na wanzanza nzabi za lwavu lwao, wanikila mitego mwiinzila yangu.

⁶ Go Mndewa Imulungu, nokulongela, “Gweye iyo Imulungu wangu.” Go Mndewa, uhulike kililo changu na unyonele bazi.

⁷ Go Mndewa Imulungu, Mndewa wangu, mkombola wangu mwene nguvu, kunikaliza kipindi chose cha ng'hondo.

⁸ Go Mndewa Imulungu, sikuuwagwelele iwanhu wehile gaja gowosulukila, na sikuuivikize mipango yao, buleavo oitapa.

⁹ Mapala ga awo onizunguluka gagubikwe, na magazo golawa mmilomo yao.

¹⁰ Makala ga moto gawalagalile, wasigwe muumoto mdisimo, na sikuwenuke kabili.

¹¹ Awo owadeta wayao sikuwamwede mwiisi, gehile gawasake wanhu wasede.

¹² Nojuwa kamba Mndewa Imulungu kowagombela wakiwa, na kowagwaa haki ngaengae.

¹³ Kweli wene haki odigwaa nhogolwa twaga jako, na waja watelele okala kumwako.