Zabuli 14 - Biblia Kikutu

ZABULI YA 14

(Kwa kilanja, Zabuli ya Daudi.)

¹ Mbozi kolonga mmoyo wake, “Kuduhu Imulungu.” Wose wabanangika, osang'hana gehile, haduhu munhu yotenda ganogile.

² Mndewa Imulungu kowasungulila iwanhu kulawa kuulanga, yalole kamba hana munhu mwene nzewele, na kamba hana munhu komzahila Imulungu.

³ Wose wahinduka, wose wabanangika, haduhu yotenda ganogile, haduhu hata imoja.

⁴ Vino awo otenda gehile wabule nzewele? Owadafuna wanhu zangu kamba magate, na hawamgelegeza Mndewa Imulungu.

⁵ Baho wengilwa na bwembwe, kwavija Imulungu kahamoja na iwanhu otenda ganogile.

⁶ Modaha kugananga ago goyolonda kutenda imunhu mkiwa, lakini Mndewa Imulungu ayo yomkaliza.

⁷ Maza ukombola wa Izilaeli wize kulawa Sayuni! Mndewa Imulungu, vonda yabweze ng'hekewa ya wanhu zake, Yakobo yadeng'helele, Izilaeli yadeng'he.