Zabuli 122 - Biblia Kikutu

ZABULI YA 122

(Lwila lwa kuchola uchanha wa Daudi.)

¹ Ndeng'helela viwanilongele, “Tuchole mng'anda ya Mndewa Imulungu.”

² Avo, twima mdilango jako, gweye Yelusalemu.

³ Buga da Yelusalemu dizengwa, ili wanhu waiting'hane hamoja.

⁴ Mumo amo makabila ga Izilaeli gochola, makabila ga Mndewa Imulungu, kamba viwalagizwe, ili waditogole twaga da Mndewa Imulungu.

⁵ Mumo vikigwa vigoda va undewa va nhaguso, vigoda va undewa va ulelo wa Daudi.

⁶ “Dipulileni tindiwalo buga da Yelusalemu, Wose okunogela gweye wakale goya.

⁷ Tindiwalo dikale mgati kuluwa lwako, usalama ukale mzingome zako!

⁸ Mbuli ya ndugu zangu na mbwiga zangu, nolonga, ‘Tindiwalo dikale na gweye.’

⁹ Mbuli ya ng'anda ya Mndewa Imulungu, Imulungu wetu, ‘Nokupulila umwede.’ ”