Walawi 1 - Biblia Kikutu

Nhosa za kusoma moto

¹ Abaho Mndewa Imulungu kamkema Musa na kalonga na heyo hana dihema da mting'hano. Kamulongela,

² “Walongele Waizilaeli mbuli zino, ‘Kamba munhu komulavila Mndewa Imulungu nhosa ya mnyama, mnyama ayo yamulave mna ikibumbila chake cha fugo ya ng'ombe hebu ng'hondolo hebu mbuzi.

³ “ ‘Kamba munhu kolava bofu da ng'ombe mbigalo kamba nhosa ya kusomigwa moto kulawa mdibumbila da fugo yake, yasagule mnyama yelibule kilema chochose. Yamgale hana ulwivi lwa dihema da mting'hano ili munhu ayo yatogoligwe na Mndewa Imulungu.

⁴ Munhu ayo yeke mkono wake mdipala da ng'ombe ayo yolavigwa nhosa, avo nhosa ayo yotogoligwa kamba nhosa ya kulohola nzambi zake.

⁵ Munhu ayo yamchinje ng'ombe ayo kuulongozi wa Mndewa Imulungu, abaho iwalava nhosa weli ulelo wa Haluni wasole idamu na kuimiza banzi zose za uupango wa kulavila nhosa ako kuulwivi lwa dihema.

⁶ Abaho munhu ayo yamchune ayo ing'ombe na yamkanhe vihande vihande.

⁷ Abaho awo iwalava nhosa weli ulelo wa Haluni weke ngodi muupango wa kulavila nhosa na wabwinhe moto.

⁸ Abaho awo iwalava nhosa wasole ivihande va inyama hamoja na dipala na mavuta gake, wavike uchanha ya umoto muupango wa kulavila nhosa.

⁹ Munhu ayo yasunhe kwa mazi ivinhu va mgati va ing'ombe na imigong'ho, na mulava nhosa yamsome kwa moto ing'ombe wose muupango wa kulavila nhosa. Nhosa ayo ya kusoma moto yolava mnung'ho umnogeza Mndewa Imulungu.

¹⁰ “ ‘Kamba munhu kolava ng'hondolo hebu mbuzi kamba nhosa ya kusoma moto, mnyama ayo yalawe mkibumbila cha fugo yake na yawe mnyama wa kimbigalo yelibule kilema chochose.

¹¹ Munhu ayo yamchinjile mnyama ayo ubanzi wa kasikazini wa upango wa kulavila nhosa uli kuulongozi wa Mndewa Imulungu. Abaho awo iwalava nhosa weli ulelo wa Haluni wamize idamu banzi zose za uupango wa kulavila nhosa.

¹² Abaho munhu ayo yamkanhe mnyama ayo vihande vihande, na mulava nhosa yavike muumoto ivihande na dipala na gamavuta mna uupango wa kulavila nhosa.

¹³ Munhu ayo yasunhe kwa mazi ivinhu va mgati va imnyama na imigong'ho, na mulava nhosa yamsome kwa moto imnyama wose muupango wa kulavila nhosa. Nhosa ayo ya kusoma moto yolava mnung'ho umnogeza Mndewa Imulungu.

¹⁴ “ ‘Kamba munhu kolava ndege kamba nhosa ya kusoma moto, avo ndege ayo yawe huwa hebu kinda da njiwa.

¹⁵ Mulava nhosa yamgale ayo indege muupango wa kulavila nhosa, na yambote isingo na idamu ivuzile mwambu umoja wa upango wa kulavila nhosa na yadisome moto dipala muupango wa kulavila nhosa.

¹⁶ Abaho yadilave tundu melo na uchafu wose yavasile mwambu wa kudilawila zuwa wa upango wa kulavila nhosa, ako kujasilagwa iditozi.

¹⁷ Abaho yamgoge gamabawa na yambalule mna imhambaga, abaho yamsome kwa moto uli muupango wa kulavila nhosa. Nhosa ayo ya kusoma moto yolava mnung'ho umnogeza Mndewa Imulungu.