Waebulania 1 - Biblia Kikutu

Imulungu kalonga kubitila Mwanage

¹ Baho umwaka, Imulungu kalonga na wahenga zetu miyanza mingi na kwa nzila nyingi kubitila watula ndagu wake,

² lakini siku zino za kuuhelelo, kalonga na siye kubitila Mwanage, heyo iyo ija kwa nzila yake Imulungu kaumba ulanga na isi na vinhu vose vili mumo. Imulungu kamsagula ayo na kamgwaa vinhu vose viwe vake.

³ Heyo ayo mng'alo wa ukulu wa Imulungu na koigala na Imulungu too! Kila kinhu cholawilila kwa lagizo jake dili na nguvu. Viyamambukize kuzisunha nzambi za wanhu, kakala kuna uukulu kuko kuulanga mwambu wa mkono wa kudila wa Imulungu mkulu.

Ukulu wa Mwana wa Imulungu

⁴ Mwana kagweleligwa ukulu kubanza wasenga wa kuulanga, kwavija twaga diyagweleligwe na Imulungu dolagusa heyo mkulu kubanza wose.

⁵ Kwavija Imulungu hamulongele bule msenga wa kuulanga yoyose, “Gweye kwa Mwanangu na lelo nolonga wose wajuwe, niye na Tatako.” Wala Imulungu halongile bule mbuli ya msenga yoyose wa kuulanga, “Niye nokuwa Tatake, na heyo kokuwa Mwanangu.”

⁶ Lakini Imulungu viyomtuma Mwanage chaudele mwiisi, kolonga, “Wasenga wa kuulanga wose wa Imulungu wamtambikile.”

⁷ Lakini mbuli ya wasenga wa kuulanga, Imulungu kalonga, “Imulungu kawatenda wasenga zake wa kuulanga wawe beho, na wasang'hanaji zake wawe milambi ya moto.”

⁸ Lakini kwa Mwanage, Imulungu kalonga, “Go Imulungu undewa wako wabule uhelelo! Kowalongoza goya wanhu zako.

⁹ Gweye kuganogela ganogile na kugehila gehile. Lekaavo Imulungu, yeli Imulungu wako kakugwaa ukulu, kubanza wayago, avo kudeng'helela.”

¹⁰ Na vivija kalonga, “Mndewa, gweye kusimika mhanda za isi baho haichanduso, na ulanga sang'hano ya makono gako.

¹¹ Avo vosegela, lakini gweye kosigala, vose volala kamba viwalo.

¹² Kowakunzakunza kamba kitanga, nao ogaluka kamba mgolole ulalile. Lakini gweye kwa vivija, na miyaka yako yabule uhelelo.”

¹³ Imulungu hamulongele ng'o msenga wa kuulanga yoyose, “Kala hano muukulu mwambu wangu wa mkono wa kudila, mbaka niwahume wanhu wakwihile na niweke hasi mmagulu gako.”

¹⁴ Vino wasenga wa kuulanga ndio choni? Wao loho iwomsang'hanila Imulungu yawatumile kuwataza wanhu waja onda waubokele ukombola.