Nongezi 1 - Biblia Kikutu

Kusonga kwa nongezi

¹ Zino azo nongezi za Sulemani mndewa wa Izilaeli, mwanage Daudi.

² Nongezi zino zowatenda wanhu watange ubala na mafundizo, na kutambula mbuli za nzewele,

³ zowafunza wanhu kutanga mbuli zili na nzewele, haki na kusang'hana ganogile na kusang'hana kamba viilondeka.

⁴ Zowagwaa ubala mizozolo, zowagwaa wabwanga kutanga vinhu na kusagula goya.

⁵ Yeli na ubala yategeleze na yongeze ubala wake, na mwene nzewele zomfunza.

⁶ Odaha kutanga nongezi na mafambulo gake, ozitanga mbuli za wanhu weli na ubala na vitendawili vao.

⁷ Kumdumba Mndewa Imulungu acho chanduso cha kutanga vinhu, lakini wabozi obezeli ubala na kuzumwa.

Usenga kwa wana

⁸ Mwanangu, tegeleza vuuzumwa na tatako, na sikuugabezeli mafundizo ga mamako.

⁹ Ago gokuwa kilemba cha ganogile uchanha ha pala jako, kamba mkufu msingo yako.

¹⁰ Mwanangu, sambi utogole kuviziligwa na wene nzambi.

¹¹ Wahalonga, “Tuchole tukampelembe munhu na kumkoma, izo tuwatowe welibule kitala chochose bila kilamuso.

¹² Tuwameze wang'hali wagima kamba kuzimu, okuwa kamba waja ohumulukila mdikolongo.

¹³ Topata mali zose za bei ng'hulu, tovika mng'anda zetu vinhu vose vituwabokile.

¹⁴ Izo uilumbe na siye, vinhu vose vonda tupate toigolela.”

¹⁵ Mwanangu, sikuuilumbe na hewo, ugomese mgulu wako sikuuchole na hewo.

¹⁶ Kwavija hewo wa mnzila ya kusang'hana gehile, pwisapwisa jao jose da kwita damu.

¹⁷ Mtego utegigwa kuno ndege kolola, mtego awo utegigwa bule.

¹⁸ Hewo opelemba kwita damu yao wenyego, oitendela mtego wa kuinamata wenyego.

¹⁹ Vivo iwaga kwa wanhu opata vinhu kwa kuwaboka wayagwe, osegesa ugima wao.

Ubala okemelela

²⁰ Ubala oguta kwa nyangi mna zinzila, okema kwa nyangi ng'hulu mmabugano,

²¹ okema mmiting'hano mikulu ya wanhu, hana zinyivi ng'hulu za gamabuga otambula mbuli zake.

²² “Mweye mizozolo! Mokuwa mizozolo mbaka lini? Mbaka lini weli na bezi odeng'helela kubezeli kwao, na wabozi okwihila kutanga vinhu?

²³ Tegelezeni viniwazuma, nowagidila magesa gangu, nowalongela mbuli zangu.

²⁴ Kwavija niwakema mulema kunhegeleza, niwahungila mkono mwize mulema,

²⁵ mugalema magesa gangu, wala hamugesile kuzumwa kwangu.

²⁶ Avo noisekelela mikubulo yenu, nowazeha vonda mugwae,

²⁷ bwembwe dahawagoga kamba kukuzumbi, kubanangika kwenu vonda kulawilile kamba kivulavumbi, magazo na lusikisiki vahawapata.

²⁸ Baho mong'hema, lakini honda niwedike bule, monizahila ng'hani, lakini honda mnyone bule,

²⁹ kwavija mukwihila kutanga vinhu, na mulema kumdumba Mndewa Imulungu,

³⁰ kwavija mugalema magesa gangu, mukubezeli kuwazuma kwangu kose,

³¹ avo moja matunda ga sang'hano zenu, movimbilwa kwa mbuli zenu wenyego.

³² Kwavija mizozolo oikoma kwa kulema nzewele, wabozi oibananga kwa kulema kugesa.

³³ Lakini kila yotegeleza kokala goya, kokala bila kudumba gehile.”