Kulawa 1 - Biblia Kikutu

Waizilaeli odununzigwa mwiisi ya Misili

¹ Gano gago matwaga ga wana wa kimbigalo wa Yakobo vivija kokemigwa Izilaeli wacholile Misili hamoja na heyo, kila imoja na wanage,

² Lubeni na Simeoni na Lawi na Yuda,

³ na Isakali na Zabuloni na Benjamini,

⁴ na Dani na Nafutali na Gadi na Asheli.

⁵ Ulelo wose wa Yakobo wakala wanhu malongo saba. Kipindi acho Yusufu kakala yalongole mwaka kuko Misili.

⁶ Kumwande Yusufu kafa na ndugu zake na wanhu wose wa ulelo uja wafa,

⁷ lakini Waizilaeli wengezeka ng'hani, wakala na nguvu na wenela kila hanhu mwiisi ya Misili.

⁸ Abaho mndewa iyagwe katawala ako Misili, mndewa ayo kakala hamjuwile bule Yusufu.

⁹ Kawalongela wanhu zake, “Loleni Waizilaeli viweli wengi ng'hani na wana nguvu ng'hani kubanza siye.

¹⁰ Avo kamba yahalawila ng'hondo, odaha kuilumba na wanhu otwihila na kututowa, na hewo olawanya mwiisi ino. Avo tuzahile nzila ya kuwahunguza sikuwengezeke.”

¹¹ Avo Wamisili weka wemilizi wawemilile Waizilaeli na wawadununze kwa sang'hano ndala. Waizilaeli wamzengela Falao mabuga ga kwikila vinhu vake, mabuga gago gakala Pitomu na Lamesesi.

¹² Lakini viwagendelele kuwadununza, vivo Waizilaeli viwagendelele kwengezeka na kwenela mwiisi yose. Avo Wamisili wawadumba ng'hani Waizilaeli.

¹³ Avo Wamisili wawatenda Waizilaeli kamba watumwa kwa kuwagwaa sang'hano ndala.

¹⁴ Wautenda ugima wao uwe mdala kwa kuwananahiza sang'hano ndala ya kuzenga ng'anda na sang'hano zose za migunda. Waizilaeli hawoneligwe bazi.

¹⁵ Avo mndewa wa Misili, kawalongela Shifila na Pua iwang'hunga, waja owataza watwanzi wa Kiebulania,

¹⁶ kawalongela, “Vonda muwataze watwanzi wa kiebulania kipindi cha kulela, yahaleleka mwana wa kitwanzi mulekeni lakini yahaleleka mwana wa kimbigalo mkomeni.”

¹⁷ Lakini kwavija wang'hunga wao wakala omdumba Imulungu hawategeleze ziwalongeligwe na mndewa wa Misili, wawaleka wana wa kimbigalo wawe wagima.

¹⁸ Avo mndewa wa Misili kawakema wang'hunga awo kawauza, “Habali hamuwakomile iwana wa kimbigalo?”

¹⁹ Hewo wamwidika, “Watwanzi wa Kiebulania hawaigalile na watwanzi wa Kimisili, watwanzi wa Kiebulania wana nguvu ng'hani, na olela yang'hali mng'hunga hanavika.”

²⁰ Avo Imulungu kawatendela ganogile awo iwang'hunga, na Waizilaeli wengezeka na wakala na nguvu ng'hani.

²¹ Kwavija awo iwang'hunga wakala omdumba Imulungu, Imulungu kawatenda walele wana.

²² Abaho Falao kawalagiza wanhu zake wose, kawalongela, “Kila mwana wa kimbigalo yonda yavumbuke kwa Waebulania mwaseni muulwanda lwa Naili, lakini kamba mwana wa kitwanzi mulekeni mgima.”