3 Yohana 1 - Biblia Kikutu

¹ Niye mvele, nokwandikila gweye Gayo, mbwigangu nikunogela mna ikweli.

² Mbwigangu, nompula Imulungu yakutende umwede na yakutendele ganogile mulukuli lwako, kamba vija vinjuwa loho yako viigendelela vinogile.

³ Nideng'helela ng'hani ndugu wano viwezile na kunongela viugendelela goya mna ikweli na viukala mna ikweli siku zose.

⁴ Nobanza ng'hani kudeng'helela kuhulika kamba wanangu okala mna ikweli.

Mbuli ya kuwataza wayagwe

⁵ Mbwigangu, gweye kotamaniligwa mna ukuwasang'hanila ndugu, hata kamba wanhu baki kumwenu.

⁶ Ndugu awo wakilongela kibumbila cha wanhu wamtogole Yesu mbuli za unogelwa wako. Chonde wataze mna inzila imnogeza Imulungu wagendelele goya na mwanza wao.

⁷ Kwavija, mbuli ya Kilisito wasonga mwanza wao bila kutazigwa na wanhu hawatogola Kilisito.

⁸ Avo siye tolondigwa kuwataza wanhu wano, ili siye na awo tuilumbe mna ukusang'hana mna ikweli.

Diotilefe na Demetiliyo

⁹ Nyandika baluwa kwa kibumbila cha wanhu wamtogole Yesu, lakini Diotilefe yalondaga ukulu hagati ya wao, hagelegeza zimbuli zinongile.

¹⁰ Vonda nize nogagubula gubu gaja gose goyosang'hana, ago gehile goyotulonga kwa uvizi. Yang'hali hanakolela na gago, vivija kolema kuwabokela waetu wamtogole Yesu wacholile kumwao, na kowagomesa wanhu olonda kuwabokela na kowawinga mkibumbila cha wanhu wamtogole Yesu.

¹¹ Mbwiga zangu, sikumkweleleze gehile, lakini mkweleleze ganogile. Munhu yoyose yosang'hana ganogile ayo wa Imulungu, munhu yoyose yosang'hana gehile hanamjuwa Imulungu.

¹² Kila munhu komulonga vinogile Demetiliyo, hata ukweli wenyego olagusa vivo. Na siye vivija tolava usindila awo, na gweye kojuwa kija kitulonga cha ukweli.

Ndamuso za kimambukizo

¹³ Ninazo mbuli nyingi za kukulongela, lakini silonda kutenda vivo kwa kukwandikila,

¹⁴ kwavija sambi baha nogesa kukona, na tolonga meso kwa meso.

¹⁵ Tindiwalo dikale na gweye. Mbwiga zako wose okulamusa. Ndamusila mbwiga zetu, kila imoja.