2 Samweli 1 - Biblia Kikutu

Daudi kolongeligwa ifa ya Sauli

¹ Sauli viyadanganike na Daudi viyabwelile kulawa kuwahuma Waamaleki, kakala Sikilagi siku mbili.

² Siku da kadatu, munhu imoja kulawa kuna ing'hambi ya Sauli, kuno viwalo vake videgigwa na kana mitimbwisi kudipala kwa usungu, kamcholela Daudi. Viyavikile behi na Daudi kaibwanha hasi haulongozi wake.

³ Daudi kamuuza, “Kolawa kwahi?” Nayo kamwidika, “Nholoka kulawa kuna ing'hambi ya Waizilaeli.”

⁴ Daudi kamulongela, “Nongela mbuli zili kuko.” Ija imunhu kamulongela, “Wanhu zetu waikimbila ng'hondo na wanhu wengi wakomigwa, wahaleka ago Sauli na mwanage Yonatani vivija wakomigwa.”

⁵ Daudi kamuuza ija imbwanga, “Kujuwaze kamba Sauli na mwanage Yonatani wadanganika?”

⁶ Ija imbwanga kamulongela, “Niye ng'hala kulugongo lwa Giliboa. Nimona Sauli kausagamila mgoha wake kuno mituka ya wakalizi na waja wakwelila falasi wakalile omkimbiza wakala behi na heyo.

⁷ Sauli viyahinduke kukisogo, kanyona niye kang'hema, niye nimwidika, ‘Niye nabaha.’

⁸ “Heyo kambuza, ‘Gweye kwa nani?’ “Nimulongela, ‘Niye na Mwamaleki.’

⁹ “Avo, kanongela, ‘Izo ung'home kwavija nilumizigwa ng'hani na usungu uniupata mkulu, lakini ning'hali mgima.’

¹⁰ “Avo, ny'hola behi yake nimkoma, kwavija njuwa hadaha kwinuka kulawa aho hasi. Lakini taji diyakalile najo mdipala na bangili diyavalile mmakono, vose nikugalila gweye mkulu wangu.”

¹¹ Daudi kavidega viwalo vake kulagusa usungu, na waja iwanhu wakalile hamoja na Daudi na hewo watenda vivija.

¹² Weka tanga, walila na kufunga kuja mbaka ichungulo kwa mbuli ya Sauli na mwanage Yonatani, na wakalizi wa Mndewa Imulungu, na isi ya Izilaeli, kwavija wanhu wengi wakomigwa kuing'hondo.

¹³ Daudi kamuuza ija imbwanga yamgalile uusenga, “Gweye kolawa kwahi?” Heyo kamulongela, “Niye na Mwamaleki, lakini nokala mumuno mwiisi yako kamba munhu baki.”

¹⁴ Daudi kamuuza ija imbwanga, “Iwaze mbaka hudumbile kumkoma munhu yasaguligwe na Mndewa Imulungu?”

¹⁵ Abaho Daudi kamkema mbwanga wake imoja kamulongela, “Mkome munhu ino!” Ija imbwanga kamtowa ija Imwamaleki mbaka kadanganika.

¹⁶ Daudi kakala yamulongele Imwamaleki, “Ifa yako ya mmakono gako, kwavija kuilavila usindila gweye mwenyego kwa mulomo wako kulonga, ‘Nimkoma munhu yasaguligwe na Mndewa Imulungu.’”

Lwila lwa Daudi

¹⁷ Daudi kamulilila Sauli na mwanage Yonatani, na kawembila.

¹⁸ Daudi kalava lagizo kwa wanhu wa Yuda na hewo wafunzigwe lwila alo, lwila alo lwandikigwa mkitabu cha Yashali. Daudi kemba,

¹⁹ “Gweye Izilaeli, ukulu wako ukomigwa kulugongo lwako. Lola magalu viwagwile!

²⁰ Sambi mudilonge buga da Gati, hebu mzinzila za Ashikeloni, buleavo watwanzi wa Wafilisiti odeng'helela, na wandele wa awo hawengile kumbi odeng'ha.

²¹ Mweye vigongo va Giliboa, honda mpate tungwe hebu mvula, na migunda yenu honda ilele ndiya yoyose siku zose. Kwavija ngao za magalu zasigwa kumgwazo, ngao ya Sauli haibakigwe mavuta.

²² Upinde wa Yonatani haubwelile kukisogo, sime da Sauli hadibwelile kukisogo, siku zose vikoma wanhu wengi, wakoma magalu.

²³ Siku zose Sauli na Yonatani wanogeligwa na wanhu na wakala wanogile, kipindi cha ugima wao hawaigolile na wadanganika hamoja. Wakala wabuha kubanza mhungu, na wakala na nguvu kubanza simba.

²⁴ Mweye watwanzi wa Izilaeli, mulilileni Sauli, yawavazile viwalo vidung'hu va kung'ala yavihambile viwalo venu kwa zahabu.

²⁵ Lola magalu viwahumigwe. Wadanganika kung'hondo. Yonatani kakomigwa kulugongo.

²⁶ Noiyalala mbuli yako, ndugu yangu Yonatani, kukala uninogela ng'hani, unogelwa wako haulongeka, ubanza unogelwa wa mtwanzi.

²⁷ Lola magalu viwakomigwe, na vinhu vao va kuitowela vabule sang'hano.”