1 Yohana 1 - Biblia Kikutu

Mbuli igala ugima

¹ Tuwapetela mweye mbuli ya ayo yokemigwa mbuli ya ugima, yakalile toka mwanduso, tumuhulika na tumona kwa meso getu, tumulola na tumkwasa kwa makono getu.

² Ugima uno viulawilile siye tuwona, na sambi tolonga kija kituwone, na towapetela mweye ugima uno wa milele, ukalile hamoja na Tata na ulagusigwa kumwetu.

³ Towapetela kija kituwone na kituhulike, ili na mweye vivija muilumbe na siye mna ukuilumba kwetu na Tata na Mwanage Yesu Kilisito.

⁴ Towandikila mweye mbuli zino kutenda deng'ho jetu ditelele.

Imulungu iyo Mulenge

⁵ Tuuhulika usenga uno kulawa kwa Yesu na sambi towapetela mweye kamba, Imulungu ayo mulenge na mgati mmwake mduhu ziza jojose.

⁶ Kamba twahalonga toilumba na heyo na kuno tung'hali tokala mdiziza, tolonga uvizi kwa mbuli zetu na kusang'hana kwetu.

⁷ Lakini kamba tokala mna umulenge kamba heyo viyali mulenge, toilumba siye kwa siye, na damu ya mwanage, Yesu yotusunha nzambi zetu zose.

⁸ Twahalonga hatutenda nzambi toivizila wenyego, na mduhu kweli mgati mmwetu.

⁹ Lakini twahatogola kamba siye twa wene nzambi, Imulungu kotamaniligwa na kotenda goya, kozigela kumgongo nzambi zetu, na kotusunha na gose gehile gatutendile.

¹⁰ Twahalonga hatutendile nzambi, tomtenda heyo yawe mvizi na imbuli yake yamduhu mgati mmwetu.