1 Petulo 1 - Biblia Kikutu

¹ Niye Petulo namtumigwa wa Yesu Kilisito, nowandikila mweye wanhu musaguligwe na Imulungu, mupwililike na mokala kamba wanhu baki mziisi za Ponto na Galatia na Kapadokia na Asiya na Bisiniya.

² Toka mwaka Imulungu Tata kajuwa na kawasagula mweye, na kawatenda mung'ale kwa Loho wake, kubitila kumtegeleza kwenu Yesu Kilisito na kawasunha kwa damu yake. Imulungu yawagwee ng'hani ng'hekewa na tindiwalo.

Tumtogole Imulungu kwa tamanilo digala ugima

³ Tumgwee nhogolwa Imulungu, yeli Tata wa Mndewa wetu Yesu Kilisito! Kwavija kwa bazi jake, katutenda tuwe na ugima wa sambi, kwa kumzilibula Yesu Kilisito kwa wafile. Sambi tugweleligwa tamanilo da ugima,

⁴ avo tobeta kupata vinhu vinogile vija Imulungu viyawekile wanhu zake. Kawekila mweye kuulanga vinhu havikola hebu kunangika hebu kuhuhwa.

⁵ Mweye vivija mokalizigwa kwa udahi wa Imulungu, kubitila kutamanila kwenu ili mupate ukombola wenu wikigwe kwa kugubuligwa kipindi cha uhelelo.

⁶ Deng'heleleni kwa mbuli ayo, hamoja sambi kwa kipindi kidodo monyunyuwala kwa kugezigwa vino na vija,

⁷ ili tamanilo jenu, difaya ng'hani kubanza zahabu joneke goya. Zahabu yobanangika lakini yogezigwa muumoto. Vivo ili kwa tamanilo jenu dogezigwa ili joneke goya na dilave ukulu na kutogoligwa na kutegelezigwa mna isiku yonda yagubuligwe Yesu Kilisito.

⁸ Hamoja hamnamona lakini momnogela na vivija momtogola hamoja sambi hammona na modeng'helela kwa deng'ho kulu hadidahika kulongeka,

⁹ kwavija mobokela fungu da tamanilo jenu, fungu dijo awo ukombola wa mizoyo yenu.

¹⁰ Watula ndagu wa Imulungu, walongile mbuli ya ng'hekewa iwezile mweye, walolesa na kuzahila ng'hani mbuli ya ukombola wenu.

¹¹ Walonda kujuwa kipindi gani mbuli ino vonda ilawilile. Kwavija Loho wa Kilisito yakalile mgati mmwao kawalagusila avo walagula magayo ga Kilisito na ukulu onda wize.

¹² Imulungu kawagubulila watula ndagu awo, kamba hawaisang'hanila wenyego lakini owasang'hanila mweye. Wao wakala olonga mbuli ya kija kimulongeligwe sambi na waja wawapetele Mbuli Inogile kwa nguvu ya Loho Yang'alile yatumigwe kulawa kuulanga. Hata wasenga wa kuulanga osulukila ng'hani kuzijuwa goya.

Mbuli ya kukala kwa kung'ala

¹³ Avo mugese goya na muitande kusang'hana, muilongoze goya wenyego. Ikeni tamanilo jenu mna ing'hekewa yonda mugweleligwe vonda yabwele Yesu Kilisito.

¹⁴ Muwe wana mumtegeleza Imulungu, sikumukale kwa kusulukila vihile kumukalile nako baho umwaka vimukalile hamujuwile ukweli mbuli ya Imulungu.

¹⁵ Kamba vija Imulungu yawakemile voyong'ala avo na mweye mung'ale mzimbuli zose zimusang'hana,

¹⁶ kwavija Maandiko Gang'alile golonga, “Molondigwa mung'ale kamba niye vining'ala.”

¹⁷ Kwavija mwahampula momkema Tata, yuyo yonda yamtaguse kila munhu bila kubagula kamba viyasang'hane, mukale hano mwiisi kamba wanhu baki kuno momtegeleza kwa kugwaya.

¹⁸ Kwavija mweye mojuwa hamulekesigwe kulawa mna igago gehile gamubokele kwa wahenga wenu, kwa vinhu vinangika kamba vija shaba hebu zahabu,

¹⁹ lakini mulekesigwa kwa damu inogile ya Kilisito, yakalile kamba mwana ng'hondolo yelibule kitala hebu kilema chochose.

²⁰ Kakala yasaguligwe na Imulungu isi ing'hali hainalumbigwa, na kagubuligwa mbuli yenu mna ikipindi kino cha uhelelo.

²¹ Kubitila heyo momtogola Imulungu yamzilibule kwa wafile na kamgwaa ukulu, avo momtogola na momtamanila Imulungu.

²² Na sambi mweye kwa kuugoga ukweli musunhigwa, na muwanogela kwa ukweli ndugu zenu, avo muinogele kwa mizoyo yenu yose.

²³ Mweye muvumbuka mwanza wa kabili kubitila mbuli ya ugima ya Imulungu ikalaga siku zose, siyo kwa mbeyu inangika lakini kwa mbeyu hainangika.

²⁴ Kamba Maandiko Gang'alile vigalonga, “Wanhu wose waigala na mijani, na ukulu wao uigala na maluwa. Mijani yonyala na maluwa gohuluka,

²⁵ lakini mbuli ya Mndewa yosigala siku zose.” Na mbuli ino ayo mbuli inogile ipetigwa kumwenu.