YOSHUA 20 - Bibilia Kui Mdedie fo Kimochi

Mṟi yedichia ya ofoṟo

¹ Nalyo Mndumii-Ruwa kawia Yoshua,

² nawie wana wa Israeli adi, “Sambuṟenyi mṟi ya ofoṟo sa mndu echiidima idichia chando njilewawasa Mose.

³ Kokoya mndu oose echiwaha mndu alakusirie naidime idichia mṟi fumuho fo owa kundu naowie ulya awaṟi itaa kiṟache kya samu.

⁴ Kii kidi mndu cho awaha nyi echidichia kiidi kya mṟi fumuho fo owa nahoṟoke mongonyi fo mṟifo naongoye wameku wa mṟifo kilya awutie. Kyasia wameku wa mṟi fo nyi wechimwambia wawemnenga handu hekaa, nakae handu hamu nawo.

⁵ Kyasia, kokoya mndu ulya awaṟi itaa kiṟache alatia mndu cho mṟasa ipfo mṟinyi, wameku wo wawode momu fo dambikia mbahi cho ko ulya motaa kiṟachepfo kyamba nyi alewaha monomaye alakusirie, iki nyi ndenga tupu chakipfa wawewodianyi kituwa oo mbokopfo.

⁶ Kyasia mbahi chu nyi echikaa ipfo mṟinyi itane ili mandi echianduyo oshangunyi lo Waisraeli wose, na iki nyi kechiwutika ili mandi mkohanyi ang'anyi awewode kiherikyo kya wuwahi wo ampfa. Kyasia ng'u mnduchu alewaaha nyi echiidima ikuwuya na kanyi koke kulya mṟinyi aledicha.”

⁷ Kyasia wakasambuṟa Kedeshi fukeri Galilaya mafumvunyi ha oruka lo Naftali, na Shekemu fuwei mafumvunyi ha Efraimu na Kiriath-arba mafumvunyi ha Yuda.

⁸ Molyolya fo meda ora lo ngamenyi lo mṟi fo Yeriko, wakasambuṟa mṟi fo Bezeri, nafo nyi fuwekeri nuka handu ha rendewele nafo nyi fuwekeri orukenyi lo wana wa Rubeni. Wakawesambuṟa mṟi fo Ramothi kulya Gileadi, nafo nyi fuwei fo oshari lo Gadi na mṟi fo Golani ipfo Bashani kuwei nyi oruka lo Manase.

⁹ Ii nyiyo mṟi ilesambuṟo yedichia ya Mwisraeli ang'u mndu mhenu akeri kiidi kyawo, yeowa ili mandi mndu awaaha alakusirie, naowepfo kundu nalawooho na ulya motaa kiṟache itane aanduyo nyi chila ya Waisraeli wose.