YOSHUA 1 - Bibilia Kui Mdedie fo Kimochi

Mndumii-Ruwa awawasa Yoshua nawade Kaanani

¹ Kyasia Mose mṟundi o Ruwa ampfa, Mndumii-Ruwa kacha ideda na mṟundi ulya o Mose Yoshua mana o Nuni,

² kambia, “Mṟundi oko Mose alemaa ipfa, koikyo kure iyo na wana wa Israeli, muhende iambada meda fo Yordani itane moida na orukenyilu njikeri imwinenga.

³ Kyamba nyi wudo njileteṟia Mose ke nyi njechimwinenga oruka lo lose mukeri ihenda ichumia huye yalo.

⁴ Mṟasa yafo nyi yechiwokia kulya nuka ya msanga ora lo kiukanyi itane mafumvu ha Lebanoni ora lo huye, na wokia meda fo Eufrate ora lo ngamenyi na oruka lo Wahiti na ipalyipalyi lya Mediterania ora lo kiukanyi.

⁵ Ambuya Yoshua, kuwode mndu ose echiidima iwinzana na iyo kiheri kyose ui na moopfo nyi njechikaa na iyo chando njiwei na mṟundi oko Mose, nyi njechikaa handu hamu na iyo manya njechikulekiapfo.

⁶ Nyi kikuwaṟi uwe ngohoda na mndu mwidimi, kyamba nyi uhenda iwa msongoru o wandu wa wahende iwada orukalu njilewateṟia waku wawo ke njechiwainenga.

⁷ Kipfa kya ikyo, ukae ui ngohoda, na mrahari, uweambuya necha kochiringa wuwawaso wulya mṟundi oko Mose alekuwawasa. Kyamba koosha necha mawawaso ho hose nyi ochiwona mboṟa handu hose ochikuidia.

⁸ Ambuya manya ulahadime kitapu ki kya wuwawaso, kyaindi ukuloshe ishi shishiṟehiepfo kio na mfiri, kundu uhende iwuta chando shishiṟehiyepfo shose, kowuta kudo nyi ochiwona mboṟa na ipfumbuka handu hose ochihenda.

⁹ Ambuya, nyi inyi Mndumii-Ruwa opfo njikeri ikuwawasa uwade ngoo njikari uwewa ngohoda, manya ulaowuo ma ipfiiyo nyi mdo kyamba njikeri handu hamu na iyo handu hose ochiida.”

Yoshua ateseheṟa wandu iambada meda fo Yordani

¹⁰ Kyasia Yoshua kawawasa wanene walya wa wandu kawawia,

¹¹ “Tengetenyi ipfo shiṟaṟonyi muwie wandu wo wateseheṟe shelya kyamba kiidi kya mfiri iṟaṟu nyi mukeri ihenda iambada meda fo Yordani muide na orukenyi lulya Mndumii-Ruwa onu akeri imuinenga luhende iwa kyoṟa kyanu.”

¹² Kyasia Yoshua kawia kishari kya Rubenyi na Gadi na kyenga kya oshari lo Manase:

¹³ “Kekumbuonyi idedo lilya Mndumii-Ruwa alemuwia kui dumbu lya mṟundi oke Mose kehamba, ‘Mndumii-Ruwa nyi echiwainenga handu hesia moo, nawainenge oruka lu,

¹⁴ kyamba waka wanu na wana wanu na shuma shanu wechikaa kiidi kya oruka lo Mose alewainenga, molyoo lya fo meda fo Yordani, kyaindi wasoṟo wose wai ngohoda na shihya shawo nyi wechiambada meda wechisongoya wana wa mayawo.

¹⁵ Cha kipfa nyi mochiwaikanyia itane ili mandi Mndumii-Ruwa echiwainenga oruka handu hesia moo chandu alemwinenga nyo, waweoṟa chandu Mndumii-Ruwa onu alewainenga luwe kyoṟa kyawo, kii kidi mochiwuya na orukenyi lu lonu muluchilie, oruka muleinengo nyi Mose mṟundi o Mndumii-Ruwa nalo nyi lukeri ora lo ngamenyi lo meda fo Yordani.’”

¹⁶ Wandu wo wakahaluo Yoshua wechihamba, “Shindo sho shose oluwia nyi lochishiwuta, na orio handu ochiluduma nyi lochihenda.

¹⁷ Ambuya chandu luleindia Mose ko orio kindo nyi wudo da lochikuindia iyo; ee da Mndumii-Ruwa nakukaye na iyo chando awekeri na Mose.

¹⁸ Nyi wudo kechiwa kokoya mndu ose echiwumbuya wuwawaso wopfo ang'u kaleha madedo hapfo ang'u kindo kyose ochimmbia, naate nawoho. Kyaindi iyo engeṟa iwada pfinya na ngohoda njiwanzi.”