YESAYA 65 - Bibilia Kui Mdedie fo Kimochi

Ruwa nekehoṟuwo wadeko

¹ Mndumii-Ruwa nahamba adi, “Njiwekuṟeheṟie ikuloṟa ko walya walawekeri iwesa mbonyi tsako. Njiwekuṟeheṟie iambilia walya walawenjishiha. Njilewia mkambo fulya fulawenjiterewa ko rina lyako: “Nyi iya njikeri! Nyi iya njikeri!”

² Njiambuyenyi! Njiambuyenyi! Mfiri puti njihoṟoye mawoko hako ko wandu wanyamaṟie, wandu wekeosha njia ilai njicha, wekeosha makusaṟo hawo wawenyi,

³ wandu wekenjipfulutsa nyashi orio kiheri, wedasia shahunyi shawo na ipfaamiṟa huya matufaṟi;

⁴ wekedamia kiidi kya shipfu na ilaa handu ha kisekenyi kio taṟaṟaa; wekelya nyama ya nguwe, na supu ya shindo shinjiwichuṟie ii kiidi kya shihiya shawo;

⁵ Wandu wekehamba “Hoṟoka iyo kumonyi, ulanjisembeṟe kipfa inyi njii Mwele kota iyo; wandu wo nyi mtsu mbuonyi tsako, modo foaka mfiri puti.

⁶ Ambuya idedo li lileṟehiyo oshangunyi loko. Njechitsia pfo, indi njechitaa, ee, inyi njechitaa kya woṟunda wowo ipfo kipetehu kyawo;

⁷ mawicho hanu na mawicho ha wandeanu handu hamu nyi Mndumii ahamba, nyo mulepfamiṟa mafumvuhu na injiruma shitoṟomosonyi, kyasia kipfa kya isho njechimuheshia kuwoka iṟunda lyawo shipetenyi shawo.”

⁸ Mndumii nahamba adi, “Chando mvinyo mhya fokewono kidingonyi kya msabibu, na mndu umu kahamba ke kulawone ko ikinyamaṟa kipfa kuwode ona lung'anyi kiidi kyakyo, nyi wudo njechiwuta kipfa kya waṟundi wako kundu njilawanyamaṟe wose.

⁹ Na inyi njechiende oshari luwukie ko Yakobo na mokioṟa o fumvu lyako wuka ko Yuda; na msambuṟe oko nechioṟa, na waṟundi wako wechikaa pfo.

¹⁰ Na Sharoni yechiwa mfiṟiha fo ipo lya machondi, na pichi lya Akori pichi lya wukiwa handu helaṟa mapo ha mbe, kipfa kya wandu wako wainjishiha.

¹¹ Kyaindi nyo muidikie Mndumii na ihadima fumvu lyako liele na iṟeheṟa kitaṟa kedasia ruwa lyelaho nyi “Gadi, ” na iichuṟia ruwa lingi lyelahonyi “Meni, ” shombo sha mvinyo isanganyi.

¹² Inyi njechiwaṟehia iwoho kui oshu, na nyo wengi mochihongoma kundu mushinjo; kitewe nyi lilya njilelaha mlaidikiye; lilya njilededa mulakiicho; indi mukawuta mawicho oshangunyi loko, mukasambuṟa mbonyi njilalechihiṟo nyitso.

¹³ Koikyo Mndumii-Ruwa nahamba adi, “Ambuya waṟundi wako wechilya, kyaindi nyo nyi mochiwado nyi njaa; ambuya waṟundi wako wechinyo, kyaindi nyo nyi mochiwado nyi nyoda; ambuya waṟundi wako wechichihiyo, kyaindi nyo nyi mochisukio;

¹⁴ ambuya waṟundi wako wechiimba na sia ya mrima, kyaindi nyo nyi mochifuha muiwasokionyi fowa ya mrima; nyi mochifihiṟa mnu kipfa kya fowa ya ngoo tsanu.

¹⁵ Nanyo nyi mochida rina lyanu liwe oseso ko wasambuṟe wako.” Na Mndumii-Ruwa nechikuwaha; nao nechilaha waṟundi wake kui rina lingi:

¹⁶ Nakyo kechiwa ichu mokuwikia amonyi ona wuyanenyi, nyi echikuwikia amonyi ona ko Ruwa o lohi; na ichu molya nyamu wuyanenyi, nyi alya nyamu ya lohi; ko Ruwa o lohi. Kipfa mawukiwa ha kuwoka hahadimika na kipfa haimaṟike mesonyi hako.

Wuyana wuhya

¹⁷ “Kipfa ambuya, njikeri iwumba ruwehu njihya na oruka luhya, na mbonyi tsa kuwoka tsechikumbuyo sepfo, ma hechiida na mrimenyipfo.

¹⁸ Indi chihiyonyi mbekeseka kitsitsi, kipfa kya ishi njiwumba; kipfa, ambuya, njiwumba Yerusalemu iwe yenyi kiichiko, na wandu wayo wawe sia.

¹⁹ Na inyi njichihiyo kipfa kya Yerusalemu, ngululu tsechiichiyo, ṟu lya kifihiṟo lyechideka, ma wandu wefihiṟa kipfa kya opfu wechiwonekapfo; nyi sia sia sele.

²⁰ Kokoya kuwode wana chi wa mfiri njiangu-pfo, ma kochiwono mmeku o maka njiangu pfo. Kipfa mana nechipfa amaie maka ihana; kyaindi mnyamaṟi amaie maka ihana nechiseso.

²¹ Nawo wechiwika mba wakaepfo; nawo wechiwaya msabibu, na ilya ndunda tsayo.

²² Wechiwika mba nalaepfo ungi-pfo; ma wechiwaya msabibu nalye ungipfo; kipfa chando mfiri ya ikidi ii nyi wudo kechiwa mkonu ya wandu wako, na wasambuṟe wako wechichihiṟo nyi iṟunda lya mawoko hawo mfiri ifoi.

²³ Wechikuwinyisha ko iṟunda lya wulya-pfo, ma wechifee ko mawukiwapfo; kipfa wo nyi oshari lo iwo wai wawikie ona nyi Mndumii, na wana wawo hamu nawo.

²⁴ Na nyi kechiwa walameterewa njechiwahaluo; wakundi ideda inyi njechiwaicho.

²⁵ Mandi-ho, shisii na machondi shechilya handu hamu, miiso yelya maṟa cha mbe; kiluli kechiwa kando ka njoka. Wechinyamaṟa ma iwaha kiidi kya fumvu lielepfo,” Mndumii ahamba.