YESAYA 55 - Bibilia Kui Mdedie fo Kimochi

Ndaho ya Ruwa ya ofoṟo

¹ “Kyasia orio mndu awodo nyi nyoda njonyi mṟingenyi, na ulya alawode fesa; njonyi huṟenyi mlye; Ee da, nchonyi huṟenyi mvinyo na maruwa, kulawode fesa ma sahabu.

² Kitewe ketaa fesa ko kindo kilai kando nki? Na shilya mowona ko kindo kilaihutsa? Njiadanyienyi mnu, mlye kilya kii kicha na ikuchihiṟa kui wunoru.

³ Dehenyi madu hanu, na injichea; Njiadanyienyi nanyo mochiwada moo; Inyi njechiwika mkundana fo mlungana, ee, osaṟiyo lo Dawidi luwanzi.

⁴ Ambuya, ngambika nawe mṟingishi ko mkambo fo wandu; msongoru na mosongoya shida mkambonyi fo wandu.

⁵ Ambuya nochilaha mkambo fo wandu ulafuichi, na mkambo fulakuichi iyo fochikudichia, kipfa kya Mndumii. Ruwa, Ruwa opfo, na kipfa kya ichu Mwele o Israeli; kipfa nakung'anyisha.

⁶ “Shihenyi Mndumii kipfa nechiwoneka, Mlahenyi kipfa nyi ai hafui,

⁷ Mndu mbicho nade ohendo loke, Na alai na wusumhanyi nade makusaṟo hake; nawuye ko Mndumii, Nao nechimsaṟia; Nache na-ko Ruwa odu, Nechimhoṟia nakamu.

⁸ “Kipfa makusaṟo hako chi makusaṟo hanupfo, ma njia tsanu chi njia tsakopfo;” Mndumii ahamba.

⁹ Kipfa chandu ngina ii huye mnu kota oruka, njia tsako nawudo tsii huye mnu kota njia tsanu, na makusaṟo hako kota hanu.

¹⁰ “Kipfa chando mvuo yekesoka iwuka huye na manzaho, ma ilaidime-se iwuya napfo; kyaindi ikanosa shilimu na ioṟisha maṟa na wandu wakawona kando;

¹¹ nyi wudo idedo lyako likeri, liwukie dumbunyi lyako; lechinjiwuya wulya pfo, lechiinutsia kilya njikundi, nalyo lechiiṟimiṟa kiidi kya shose njilidumie.

¹² Kipfa mochikure ko sia, mochisongoyo nyi ofoṟo moshiicho shiimbo shiwukie mafumvuhu na shitoṟomosohu. Mashidi ha pichinyi hechikapa kapa mawoko.

¹³ Handu ha msha kochido opanyi, handu mbeche tsetocha, mboha. Kindo ki kechiendie Mndumii rina, Kechiwa kichano kya mlungana, Kilechiwa ikumba kuleshe.”