YESAYA 50 - Bibilia Kui Mdedie fo Kimochi

¹ Mndumii nahamba adi, “Yeku paruo iya yesama mayanu, yeloṟa ke njilelekana nao? Ang'u njilemukumba kou kiidi kya iwa wainjiwesa sile? Nyo nyi mulekumbo kipfa kya wunyamaṟi wonu; kake mayanu naledeo kipfa kya wuwicho woke.

² “Kyasia lilya njilecha nkili kulawewode mndu? Ngalaha, kuwode alehaluopfo? Ngesa! Owoko loko lui lufui njilemo ikiṟa? Ngesa njiwode pfinya tsechiṟa? Ambuya kui ideda lyako ngahadutsa ipalyipalyi, meda ya mṟinga ngaihaluo nuka ya msanga; makunga hayo haidaa kipfa kulawode mṟinga, wandu wapfa kipfa kya nyoda.

³ Inyi njiṟika ngina wuiwu, ngawehaluo makunyia sohoṟo yawo.”

Mṟundi o Mndumii-Ruwa

⁴ “Mndumii-Ruwa nanjiinengie olimi lo iwo welosho, njimanye chando njechimbanza kui madedo ha icho awinyie, nekenjiamtsa orio mfiri kilawo, kudu koko kuicho cha wandu welosho.

⁵ Mndumii-Ruwa ameṟuhusuo kudu koko, ma njilawade mtolo, ma njilawuye numa.

⁶ Njilehalutsia walya wenjikapa mhongo foko, walya wetufuo ngerero tsa nguchu tsako; njileṟika kyamu kyako kundu kilatalukepfo ma ipuchio mada-pfo.

⁷ Kipfa Mndumii-Ruwa nechinjitarama; kui kipfa kya ikyo ndeṟeenzepfo, njilewanza kyamu kyako, njiichi ke njechisonupfo.

⁸ Ichu monjiinenga kilya kinjisumhanyi nyi ai hafui; nyiu ichu echirekiana na inyi? Luhoṟotsane; nyiu echiidima injiwinza? Nanjisembelie.

⁹ Ambuya, Mndumii-Ruwa nyi echinjitarama; nyiu echinjianduya ke njii mdeko? Ambuya iwo wose wechikuo cha nguwo; ngama yechiwamaa.

¹⁰ Nyiu kiidi kyanu aowoye Ruwa, ekundia ṟu lya mṟundi oke? Ichu ekeida memenyi, alawode saa, akusirie rina lya Mndumii, na ikusiria Ruwa oke.

¹¹ Ambuyenyi nyo mose muiatsa modo, muikupfungia shimunyi; idenyi kiidi kya olewo lo modo fonu, na kiidi kya shimunyi sho muleatsa. Mochiambia ishi kui owoko loko; mochilaa mui wasokie nyi fowa.”