YESAYA 36 - Bibilia Kui Mdedie fo Kimochi

Waashuru waowesha Yerusalemu

¹ Kikashika, maka fo ikumi na kaana fo wuchili wo mangi Hezekia, Senakeribu, mangi o Ashuru, kado kundu nakapane na mṟi iya yose ya Yuda iwode mfiṟiha, kaiwada.

² Mangi o Ashuru kaduma mndu mchili o wandu wa shida wuka Lakishi mṟasa Yerusalemu, ko mangi Hezekia, hamu na ichekeṟo ling'anyi. Nao kahoṟoka kufui na mfongo fo nduwa ya huye ii kiidi kya njia ing'anyi ihendie pichinyi lya wesanja nguwo.

³ Wakakoya Eliakimu mana o Hilkia, awei mohoṟokia mba ya Mangi, na Shebna, mṟehi, na Yoa, mana o Asafu, moṟehia meri.

⁴ Kyasia mnene ulya o shida kawawia “Kyasia, wienyi Hezekia, ke mangi ang'anyi o Ashuru nahamba adi, ‘Nyi kikusirio kiki iyo ukikusiriye?’

⁵ Ngahamba, chila tsapfo, na pfinya tsapfo tsa shida, ni madedo ha wulya; kyasia nyiu umkusirie mṟasa konjileha inyi?

⁶ Ambuya nyi ukusirie ndichi ya iwale li lifunjikie, nlyo Misri, kokoya mndu akusiria nyekeshio mawokonyi na imkoṟa; nyi wudo ai Farao, mangi ya Misri, ko wose wakumkusirie.”

⁷ Kyaindi konjiwia ke so lukusirie Mndumii-Ruwa odu, ngesa chi ichu Hezekia alewunduo handu hake hawekuiriye na shitaṟa shake shedasia, kechiwia wandu wa Yuda na Yerusalemu, pfirenyi ndi oshangunyi lo kitaṟa-ki?

⁸ Kyasia wulalu, keinengenyi mndumii oko, mangi o Ashuru, wukaṟa, na inyi njechikuinenga frasi shiku shiwi, kokoya iyo ko ora lopfo nochiidima idosa wandu huyawo.

⁹ Nochiidima kuda wulalu iwihiṟa oshangu lo mchili umu o waṟundi wai watutu wa mndumii oko na ikusiria Misri uinengo magari na frasi?

¹⁰ Ngesa, nyi inyi ngado kundu njikapane na handu ha na iharumatsa, kulawode chila ya Mndumii? Mndumii nyio alenjiwia, do nokapane na orukalu nolurumatse.

¹¹ Naalyo Eliakimu, mana o Hilkia, na Shebna, na Yoa wakawia mnene ulya o shida, “Kededa na wandu wa wai waṟundi wapfo kui kishomo kya Kiaramu; kipfa lukiichi; ma kuladede naso kui kishomo kya ki Yuda, madunyi ha wandu wose wai mawandenyi.”

¹² Indi mnene ulya kawawia, “Alewo mndumii oko, nanjidumie ko mndumii opfo, na kopfo iyo, njidede madedo ha? Anjidumie ko wandu-wa wai mawandenyi, kundu walye madifi hawo wawenyi na inyo mahuamo hawo kimu nanyo?”

¹³ Kyasia mnene ulya o shida kahoṟoka kadeda na ṟu ling'anyi kui kishomo kya Kiyuda kehamba, “Adanyienyi idedo lya

¹⁴ Mangi ang'anyi, mangi ya Ashuru nahamba adi, ‘Hezekia nalamulembe, kipfa echiidima imukiṟapfo;

¹⁵ Manya mulalekie Hezekia namuwike msiha fokusiria Mndumii; kechihamba, Mndumii nyi lohi echilukiṟa, mṟi fo fochiidimika idambikio mawokonyi ha mangi ya Ashurupfo.

¹⁶ Mulaadanyie Hezekia;’ kipfa mangi ya Ashuru nahamba adi, “Wadenyi mbuya na inyi, kurenyi muche injisahiya, mulye orio mndu ndunda tsa msabibu yake, na ndunda tsa mkuyu yake, muwenyo orio umu mṟinga fo nduwa yake amonyi;

¹⁷ mṟasa njiche imuduo oruka kui cha oruka lonu muwenyi, oruka lo mso na mvinyo, oruka lo mkate na madema ha msabibu.

¹⁸ Kuṟisenyi mulawone mochilembo nyi Hezekia kechihamba, Mndumii nechiluringa. Ngesa kuwode ruwa umu o masanga alemekiṟa wandu wake na owoko lo mangi ya Ashuru?

¹⁹ Weku maruwa ha Hamathi na ha Arpadi? Weku maruwa ha Sefarvaimu? Ngesa walekiṟa Samaria na iwaashuo owokonyi loko?

²⁰ Kiidi kya maruwa ha hose hai kiidi kya njoruka tsi, nyi waki waleashuo oruka lowo kwi owoko loko, mṟasa Mndumii nakiṟe Yerusalemu na owoko loko?”

²¹ Kyaindi wandu wakatsia do; ma walamhaluo ma idedo limu; kipfa nyi mbe iwawaso lya mangi ke walahaluo kidedo.

²² Nalyo Eliakimu, mana o Hilkia, awei mringi o mba ya mangi, na Shebna mṟehi na Yoa mana o Asafu, menyi oṟeho lo meri, wakahenda ko Hezekia, na nguwo tsawo tsirandukie, wakaongoya Hezekia madedo halya hose ha mnene ulya o shida.”