YESAYA 35 - Bibilia Kui Mdedie fo Kimochi

Sia ikeri icha ko Yerusalemu

¹ Nuka na handu hadekie kochichihio; kundu ko olele kochikapa ngululu na iwaṟa shiwaṟo shepfaama.

² Lyewaṟa shiwaṟo shifoi, na ichihiyo, ee, kui ngululu na iimba; lyechiinengo wucha wo Lebanoni, kiṟumi kya Karmeli na Sharoni; wechiwona kiṟumi kya Mndumii, na wunene wo Ruwa odu.

³ Wihiṟienyi moo mawoko mafafa, wanzenyi ndi tsileheli.

⁴ Wienyi wenyi mrima mfafa, karienyi mulaowuo; ambuya Ruwa onu nakeri icha na kiṟache, na wueri wo Ruwa; nechicha namukiṟe nyo.

⁵ Nlyong'u meso ha kipfupfuṟe hechiambuo, na madu ha kichoi hechiṟuhuka.

⁶ Nalyo ichu ai kileta echiitola-tola cha sariha, na olimi lo ichu ai pipi lochiimba; kipfa kundu ko nuka kulawode mṟinga fochiichuo pacha na shimeda naawo.

⁷ Mlelya fowaa cha mṟinga fochiwa nduwa ya mṟinga, na oruka luangari lochiwa soka tsa mṟinga; kanyi ko mapara kundu hekelaa, kochiwada maṟa hamu na shiwale na natsi.

⁸ Handu ho kochiwada njia ing'anyi, nayo yechilaho, “Njia ya Waele;” Walai waele wechiidahopfo; kyaindi yechiwa kipfa kya wandu wo wakyaṟo, ma chandu wai matondo wechidekapfo.

⁹ Handu ho kochiwada mwiso-pfo, ma indo liwicho lyechiidaho-pfo, nyi walya wakiṟe tupu nyiwo wechiida njia yo.

¹⁰ Na iwo wakiṟe nyi Mndumii wechiwuya, wechishika Sioni wechiimba, na sia ya mlungana yechiwa huye ya mdo yawo; nawo wechiwona iseka na sia, iwawio na ikuinadia shechidicha.