YESAYA 32 - Bibilia Kui Mdedie fo Kimochi

Mangi mhendeli

¹ Ambuya mangi yechiikolonyia kui wukiilohi, na wanene wechichilia kui mwaanduye.

² Na mndu nechiwa cha handu heowa cha otanu, na handu hekuringa na masinanu ha kiwiriwiri; cha meda ya mṟinga handu hahadutsu haumu, cha kiṟinje kya iṟaṟa ling'anyi kiidi kya oruka luleheli.

³ Ngoseṟa meso hawo walya wewona hechishingapfo, na madu ha walya weicho hechiadanyia

⁴ Na mrima fo mndu o kipufu fochiwada wuṟango, na njolimi tsa wandu wenyi iwowoda, tsechideda necha.

⁵ Tondo lyechiidima ilaho nyi liwode olohopfo, ma ichu muumu echihambo nyi mlekipfo.

⁶ Kipfa tondo lyededa sha wutondo, na mrima foke fochitana mawicho, kundu kuwutike mtambo na ihamba shilai lohi huye ya Mndumii, kundu wade mbihu ya wandu iwodo nyi njaa, na ichu awodo nyi nyoda nalawone kenyo.

⁷ Shombo sha ichu amuumu nyi shiwicho; nekehia kui mtambo mbicho, kundu warumatse iwo wai wafafa kui madedo ha wongo, mndu ahuṟi ma kadeda madedo hawode wulohi.

⁸ Indi ichu awode oloho, nekekusaṟa oloho, nao nekewada mbonyi tsa wusoṟo wo lohi.

Ngapo na sungusihu ko waka wa Yerusalemu

⁹ Kurenyi nyo waka muwodo nyi sia, adanyienyi ṟu lyako; lanye wana wa waka wa wandu mlai wa osaaṟe, dehenyi madu hanu muicho madedo hako.

¹⁰ Kipfa nyi mochikisokiso mkonu ishikie ngoseṟa ya maka, nyo waka mokekushela kipfa shilimu sha msabibu shechitsitsa, kiheri kesambuo shindo sha ndema kechikaa kichepfo.

¹¹ Dedemenyi, nyo waka muwodo nyi sia; kulisenyi wukiwa nyo mlai na osaaṟe; kuatuonyi; wutenyi nguwo tsanu tsose, ṟaenyi masaṟa shitsinyi shanu.

¹² Wechikapa shipeta kipfa kya madema mecha, kipfa kya msabibu fuleṟaa mnu.

¹³ Oruka lo wandu wako lochialutsa msha na mbeche; ee da, kiidi kya mba tsa sia, mṟi fui na ngululu;

¹⁴ kipfa mba ya mangi yechideo; mṟi fuwei na wandu wafoi fochiwuṟa wandu; sohu na mnaṟa shechiwa kanyi ka mando ha nja mlungana, sia ya nzoi tsa ngeṟenyi, mapo ha machondi hechilisa;

Maheri ha ofoṟo

¹⁵ Mṟasa mumuyo fuche huye yadu fuwuka huye; mṟasa kundu ko nuka kuhoye olele kochiwa mdemi fuiṟaa mnu; na mdemifo fokeṟaa mnu fusendo nyi ngeṟa.

¹⁶ Nahong'u mwanduye fochikaa kundu ko nuka, na wulohi wochikaa kiidi kya mdemi fochiṟaa mnu.

¹⁷ Na iṟunda lya wulohi lyechiwa ofoṟo; na shilimu sha wulohi shechiwa nyi olele na mkusirie kitsitsi.

¹⁸ Na wandu wako wechikaa mbenyi ya ofoṟo; na kundu kui kucha swai; na handu hesia moo hai haoloru.

¹⁹ Indi na kikaki, na kukape mvuo ya maho, kiheri keolotsa mashidi ha ngeṟenyi; na mṟifo fochiolotso.

²⁰ Nanga nyo mokewaya mbeu mbai ya mṟinga yose, na ida madende ha mbe na nzoi hahendesane kose kose.