YESAYA 31 - Bibilia Kui Mdedie fo Kimochi

Misri yechiidima itaramapfo

¹ Ochia lo walya waisoka wechihenda Misri wawone ngaya, wechikusiria frasi; wechikusiria magari kipfa nyi hafoi, na wehenda na frasi kipfa nyi wai ngohoda; kyaindi wakeri iambuya ichu ai Mwele o Israeli-pfo, ma wakeri ishiha Mndumii pfo!

² Kyaindi manya o nawode wuṟango, nao nyi echiende wuwicho, ma echifurunja madedo hakepfo, indi nechisama huye ya wose wai kanyi kowo walya wewuta mawicho, na huye ya ngaya ya wose wewuta sha mkika.

³ Kyasia Wamisiri nyi wandu ma chi Ruwapfo, na frasi tsawo nyi nyama ma chi mumuyopfo; Mndumii ili echihoṟwo owoko loke, ichu motarama nechikapa mtulia, na ichu motaramo nechioloka, nawo wose wechitsitsa handu hamu.

Ruwa nechiringa mṟi fo Yerusalemu

⁴ Kipfa Mndumii nanjiwia adi, “Chandu kii ili mwiso foipete na ialea lya mwiso huya kichau kyalo kiwode, walisi wafoi wakalaho kundu wakape, kyaindi mwiso fochiowesho nyi maṟu hawo ma kipfa kya mtiṟi fowopfo; nyi wudo Mndumii menyi Matoṟito echisoka kundu nakapane shida huya fumvu lya Sioni, na huya sohu yake.

⁵ Cha ndehe tsirunduka, Mndumii menyi Matorito nechiringa Yerusalemu; nechiringa mṟifo na ifukiṟa, nechiida huyafo na ifushikia.

⁶ Halukienyi ichu mulemleha nyo wana wa Israeli.

⁷ Kipfa kiidi kya mkonufo orio mndu nechikumba sanamu tsake tsa fesa, na sanamu tsake tsa sahabu, itso mawoko hanu haṟundie, tsikawa wunyamaṟi konu.

⁸ Nlyondo Mwashuru-cho echioloka ko oshu lulai lo mndu; na oshu lulai oshu lo mndu lochimlya; nao nechidicha oshu, na wanake wake wechitaa okamba.

⁹ Na kiṟumi kyake kechideka kipfa kya wuowu, na wanene wake wechisonu mnu kya bendeṟa Mndumii ahamba, ichu modo foke fui kiidi kya Sioni, na olewo lo modo lui kiidi kya Yerusalemu.”