YESAYA 24 - Bibilia Kui Mdedie fo Kimochi

Ruwa nechihoṟwo wuyana

¹ Ambuya Mndumii amehaluo wuyanawu, wukawa wulawode kindo nawuhaluo msefu, nawuhaluo, na irahanyitsa wose waipfo.

² Na kechiwa chandu kikeri ko wandu, nyi wudo kechiwa ko mkohanyi; chandu kikeri ko isinga, nyi wudo kechiwa ko mndumii olyo; chandu kii ko isinga ika, nyi wudo kechiwa ko mka mangi; chandu kii ko mohuṟa, nyi wudo kechiwa ko mokumba; chandu kii ko moinengia, nyi wudo kechiwa ko moinengio; chandu kii ko ulya o mbucha aiṟimiṟa, nyi wudo kechiwa ko icho momtarama kaiṟimiṟa.

³ Wuyanawu wochihaluka wulya piu, na inyamaṟo kuchu; kipfa Mndumii adeda idedo lyo.

⁴ Wuyana wuikapa kilio, wuiuma; wuyana wuipooka, wuiuma; wandu wanene wa wuyana waipooka.

⁵ Kake wuyanawu wui wufanyitse ngafu kui wandu wekekaapfo; kipfa watahachie mawawaso hako, wakailacha wuwawaso, wakeleha kyasa kya mlungana.

⁶ Nkyo kitewe oseso lolya wuyana wu, na iwo waipfo wakawono wenyi wunyamaṟi, nkyo kitewe wandu wose wekaa wuyanenyi wakarumatso, wandu waletsuhaa wakawa waangu tupu.

⁷ Kipfuo kya mvinyo kikapa kilio, msabibu fonaa, wandu wose wawewode mrima foikesa awalya waluo.

⁸ Ṟu lya sia lya shinanda lyatsitsa; kifahiio kya wenyi msiha kyasia; sia ya kinanda yatsitsa.

⁹ Wechinyose mvinyo na shiimbopfo; wunanzi nyi wochiwawa ili wechinyo.

¹⁰ Mṟi fo ngafu fowunduyo; orio mba injishinge, kulawone ma umu aida napfo!

¹¹ Kuwode kifuhio kiidi kya njia ing'anyi, kipfa wunanzi wui wuhoye meema na ifuda lya oruka likadeka.

¹² Kiidi kya mṟi kudeke, na kichumi kyake kiikikape kikanyamaṟika.

¹³ Kipfa kiidi kya wuyana, kiidi kya wandu wa mkambo, kechiwa kidi; cha kiheri kesingitsa mkuyu, cha kiheri kesana sabibu kiheri kya shilimu.

¹⁴ Iwa wechiira maṟu hawo, wechikapa kitohio; kipfa kya kiṟumi kya Mndumii, wechikapa kitohio wuka ipalyipalyinyi.

¹⁵ Kyasia ṟumishenyi Mndumii wuka ora lo ngamenyi, ṟumisha rina lya Mndumii-Ruwa o Israel, kiidi kya oruka lui kiidi kya ipalyipalyi.

¹⁶ Wuka njora tsa kuleshe tsa oruka luicho shiimbo, “Naṟumisho menyi wulohi.” Nyilyo njilehamba, ipoka lyako! Ipoka lyako! Ochia loko! Wewuta kui mtambo wawuta mtambo, ee da, wawuta kui mtambo wawuta mtambo mnu.

¹⁷ Wuowu na rina, na mdeho, shi huyapfo, iyo ni menyi mokaa wuyanenyi.

¹⁸ Kechiwa orio modicha ṟu lya wuowu nechioloka rinenyi, na orio modo awuka rinenyi newado nyi mdeho; kipfa matiṟisha hai mawike huye haimaṟuhuo, na njotende tsa wuyana tsidedema.

¹⁹ Wuyana wufunjikafunjika mnu; wuyana wuipaṟika paṟika mnu; wuyana idihina, wadihina mnu.

²⁰ Wuyana wui ruika cha mndu mnanzi, nawo wui iwila cha kitaṟa kya mndu mrohiye; na mhanda fo wunyamaṟi fowurohiya; nawo wochioloka manya wochikuresepfo.

²¹ Nakyo kechiwa kiidi kya mkonufo, Mndumii nechikapa wandu wa shida walya wai handu haleshe hakuire na wamangi wai kiidi kya wuyana;

²² nawo nyi wechisanyio handu hamu chandu wapfungo wasanyio rinenyi, nawo nyi wechikumbo mbenyi ya wapfungo; na numa ya mafiri hafoi wechicheo.

²³ Nlyong'u meri fochileha iwaa na mnengeṟi fuṟeenze; kipfa Mndumii menyi Matorito nechichilia huya fumvu lya Sioni, na kiidi kya Yerusalemu na oshangunyi lo wameku wawode kiṟumi.