YEREMIA 31 - Bibilia Kui Mdedie fo Kimochi

Waisraeli wawuya na kanyi

¹ Mndumii-Ruwa nahamba, “Kushika kiheri inyi njechiwa Ruwa o shishari shose sha Israeli nawo wechiwa wandu wako.

² ‘Inyi Mndumii-Ruwa njihamba; wandu walya walekia iwoho, njilewainenga mboṟa kulya nuka ya msanga. Kiheri Waisraeli waweshiha isia moo,

³ inyi Mndumii-Ruwa ngawachea njiwuka haleshe. Inyi njikundi kui ikunda lya lohi, ko ikyo ngaweengeṟa iwa mhendeli kopfo.

⁴ Njechikuwika wuhya na kechiidimika, iyo Israeli ui mcha! Nochiduo se mtingo yapfo noshine ko sia na ifuda.

⁵ Nochiwaya se msabibu, huye ya mafumvu ha Samaria, wademi wechiwaya mbeu, na ichihiṟo nyi shilimu shayo.

⁶ Kipfa kiheri kicha mringi nakape ombe, kiidi kya shifumvu sha Efraimu. “Kurenyi, luhende huye mṟasa Sioni, ko Mndumii-Ruwa, Ruwa odu.’

⁷ “Kipfa Mndumii-Ruwa nahamba adi, ‘Imbenyi ko sia kipfa kya Yakobo, kapenyi mṟoṟo kipfa kya mkambo fung'anyi, onguonyi, chihiyonyi na ihamba; “Mndumii-Ruwa nakiṟie wandu wake, nawaendie okiṟo walya waletsuhaa na Israeli!’

⁸ Ambuya, njechiwaende wawuka oruka lo mtsudu, njechiwasanyia wawuka mtsitsionyi fo oruka. Wose wechikaa-pfo, manya shipfupfuṟe na shileta. Waka wanene na wakeri ifee, mamiingi fung'anyi mnu fochiwuya na iya.

⁹ Wewuya wechitonyitsa mchenyeṟe, njechiwawihiṟa njewalembalemba, njechiwaitsa mbai ya shimeda sha mṟinga, kiidi kya njia njihoṟotsu kulawode ikapa tulia, kipfa inyi ngawa ndee o Israeli, Efraimu nyi mana oko mmbee.

¹⁰ Lanye mkambo fo wandu adanyienyi idedo lyako inyi Mndumii-Ruwa, oguonyi njorukenyi tsa kuleshe, hambenyi, ‘Ichu alenanatsa Israeli, nechimsanyia, nechimringa cha mlisi aiambuya machondi hake.’

¹¹ Kipfa inyi Mndumii-Ruwa, njilekiṟa Yakobo, ngamkiṟa njimbuta ko wenyi pfinya kota o.

¹² Wechicha wechiimba ko maṟu huya fumvu lya Sioni, wechiwona kiṟumi huya wucha woko, inyi Mndumii-Ruwa. Ko shilimu sha moo, mvinyo na mafuda njekemuinenga, ko machondi na mmbe da; ohendo lo moo yawo, yechiwa cha mdemi funose, manya fochipooka sepfo.

¹³ Nalyo wana wawo wawaka wechichihio na itema, wanake na wameeku wechifuda na sia. Njechihaluo kilio kyawo kiwe sia, njechiwalembalemba na iwainenga sia, handu ha mkuinadie.

¹⁴ Njechiihutsa wakohanyi kwi shinoṟu, njechiwawihiṟia moo wandu wako na wucha woko. Nyi inyi Mndumii-Ruwa ngahamba.”

Isaṟia lya Ruwa ko Israeli

¹⁵ Mndumii-Ruwa ahamba adi, “Kulya Rama kuleichio ṟu lya ofuho sa lunene na shilio, Raheli nafihiṟia wana wake, ma nalaidikie iwihiṟio moo, nyi kipfa walaiho se.

¹⁶ Wulalu da ifihiṟa, angatsa mchenyeṟe yapfo, kipfa nochiinengo wuwinzi ko iṟunda lyapfo, nyi inyi Mndumii-Ruwa ngahamba, ‘Wana wanu wawuka oruka lo wakituwa wanu.

¹⁷ Kuwode mkusirie ko mkonu yanu ikeri icha, nyi nyi Mndumii-Ruwa ngahamba; kipfa wana wanu wechiwuya orukenyi lowo.’

¹⁸ “Ngaicho Efraimu kenunuwa: ‘Nulenjikapa konjilosha wuindi, kipfa njiwekeri cha ihache, lilaichiwie ipfungo. Njihalutsa na inyi njekuhalukia, kipfa iyo nyi Mndumii-Ruwa, Ruwa oko.

¹⁹ Kipfa ngamekudekio, njiledumbuya, na ngamemaa ilosho, njilehamba samanya, ngaṟeenze na isonu, kipfa tewe tsa uwanake woko tsilenjiosha.’

²⁰ Efraimu nyi manoko mkunde; o nyi manoko mkunde mnu. Nkyo kitewe orio mandi ngamwowesha, ngaweengeṟa imkumbuo. Mrima foko fumwindukie ko mecha; na lohi njechimsaṟia. Nyi inyi Mndumii-Ruwa ngahamba.

²¹ “Wika shiacho njienyi tsapfo, tochia mambo tsekuloṟa okondo, kumbuo necha njia iya ing'anyi, njia iya uleida ochihenda. Iyo Israeli wuya, wuya na kanyi, mṟinyi yapfo.

²² Nochipfio nyi mdo mṟasa indi? Iyo Israeli ulawode wuhendeli? Kipfa inyi njiwutie kindo kicha wuyanenyi; mndu mka nechiringa mndu msoṟo.”

Mboṟa kiheri kiicha

²³ Mndumii-Ruwa menyi Matorito, Ruwa o Israeli, nahamba adi, “Kiheri-kyo njechimuinenga-se mboṟa nyo wandu wa Israeli, wo wechionguo-se kiidi kya oruka lo Yuda na kiidi kya mṟi yake wechihamba: “Mndumii-Ruwa nakuwikie ona iyo oruka lusumhanyi, nakuwikie ona iyo fumvu lyele!”

²⁴ Naalyo wandu wa Yuda na mṟi yake yose, wademi na walisi wekeidaida na mapoo hawo, wechikaa-pfo kimu.

²⁵ Walya waleheli njechiwainenga pfinya, na walya wadoko njechiwainenga pfinya.

²⁶ Nkyo kitewe mndu eidima ihamba: “Njilekure ngamanya ke mado hako halenjitarama mnu.”

²⁷ Mndumii-Ruwa nahamba, “Ambuya kuicha kiheri njeichuṟa oruka lo Israeli na lo Yuda wandu na shiuma na orio kindo kii na moo chandu mdemi ekeola mbeu.

²⁸ Chandu mbeimuambuya necha, iwakuṟuo, iwawunduo, iwaolotsa, iwanyamaṟa na iwalisa wukiwa nyi wudo njechiwaambuya necha iwawaaya na iwawika.

²⁹ Kiheri kyo wandu wechiidima ihamba-se:- “Wameeku walelya sabibu tsewawa, na maheho ha wana hakapfa mpfipfi.”

³⁰ Kyaindi ote! Orio umu nechipfa kipfa kya njonyamaṟo tsake amonyi; nyi ulya alelya sabibu njiwishi nyio maheho hake hechipfa mpfipfi.”

³¹ Mndumii-Ruwa nahamba, “Mkonu ikeri icha njiwike mkundano mhya na wandu wa Israeli na Yuda.

³² Mkundano fu chi cha fulya njilewika na waku wawo lilya njilewawuta Misri ko owoko loko pfo, kipfa mkundana fu walefutehiya, ma chandu inyi mbei Mndumii owo. Inyi Mndumii-Ruwa ngahamba.

³³ “Nduma ya mafiri ho njechiwika mkundana fo mbaṟi i na Waisraeli; Njechiwika wuwawaso woko kiidi kyawo na ifuṟehia kiidi kya mrima yawo. Inyi njechiwa Ruwa owo nawo wechiwa wandu wako. Nyi inyi Mndumii-Ruwa ngahamba.

³⁴ Ma kechiwa iloshana wehamba manya Mndumii-Ruwa pfo, kipfa wose watutu na wang'anyi wechinjimanya inyi Ruwa. Kipfa njechiwahoṟia madeko hawo, ma njechikumbuo se manyamaṟo hawo pfo.”

³⁵ Nyi wudi Mndumii-Ruwa ahamba, ichu rina lyake nyi Mndumii-Ruwa menyi matorito, ichu alehamba mnengeṟi fuwae mfiri, meri na nyenyeri tsiwae kio na iwika ipalyipalyi liwade masinanu.

³⁶ Mndumii-Ruwa nahamba adi, “Inyi njilehawa mnengeṟi fuwae mfiri, meri na nyenyeri shilimike kio; kake, inyi njekeṟingitsa ipalyipalyi, likawewuta masinanu. Rina lyako inyi nyi Mndumii-Ruwa menyi matorito. Kyasia, na inyi ngahamba: chandu njiwanza isho shiṟeheṟe shose sha kio na ko mbaṟi iyo iyo Israeli wechideo wai wandu wako.

³⁷ Kokoya ruwehu lyechiwa ihesha na otende lo wuyana luwewa iṟisa , kyasia njemukumba kuleshe na wawee wa Israeli, kipfa kya mbonyi tsose, walewuta. Inyi Mndumii-Ruwa ngahamba.”

³⁸ Mndumii-Ruwa nahamba: Mkonu ikeri icha mṟi fu fo Yerusalemu fuwiko wuhya kipfa kya Mndumii-Ruwa, wokia mnaṟa fo Hanaweli ushike kichumi kya mbai.

³⁹ Na orusu lohesha lochihoṟotso mṟasa mshike fumvu lya Garebu, itengetso mṟasa Goa.

⁴⁰ Pichi lyose lileṟiko wapfu na ikumbo-pfo ifu, madema hose, mṟasa kimeda kya Kidroni, mṟasa ora lo kichumi kya frasi woambuya ora lo ngamenyi, lochiwa luele lo Mndumii-Ruwa. Kuwode kindo kechinyamaṟo pfo pfo ma iwunduyo se mlungana pfo.”