WALEWI 5 - Bibilia Kui Mdedie fo Kimochi

Mbonyi tsingi tsiwaṟi iwutio mwano yehoṟio

¹ Na mndu oose kawuta wunyamaṟi kyamba naicho ṟu lyelisiṟa nyamu, na kawa mṟingishi, ke nalewona ang'u nalemanya, alemehambe na pata idedo-lyo-pfo, nlyondi echikudika wunyamaṟi woke amonyi;

² ang'u kokoya mndu apaya kindo kiterefukie, cha mnying'a fo indo lya ngeṟenyi lii kindo kiteṟefukie; ang'u kokoya nyi mnying'a fo indo lya mba lyiteṟefukie; ang'u kokoyanyi mnying'a fo ishinu lyiteṟefukie, nao kindokyo kikamdekia nalakikimanye, katerefuka, nlyondi echikudika wunyamaṟi woke o amonyi.

³ Ang'u kokoya apaya ngafu ya mndu o wandu, ngafu yo yose sa yechimteṟefutsa, na mbonyiyo nalakiimanye; ili echiimanya, nlyondi echiwada mti.

⁴ Ang'u mndu oose kalya nyamu, kasenda na dumbu lyake wodimadima, iwuta wuwicho, ang'u iwuta mecha, idedolyo lyose mndu echisenda wolya nyamu alakusaṟa, nalyo idedolyo lyikamdekia, ili echilimanya, nlyondi echiwada mti kiidi kya kimu kya isho.

⁵ Nahong'u ili echiwada mti fo shindo cha kimu kya isho, nlyondi echieweṟo na idumbuya kya isho aletehia;

⁶ nao nechiendie Mndumii mwano foke fo mti kipfa kya wunyamaṟi woke alewuta, huṟuwi ang'u suwana kuwuka mfiṟihenyi foke, kiwe nyi mwano fo wunyamaṟi numa mkohanyi nammbutie kisanza kipfa kya wunyamaṟi wo woke.

⁷ Kyaindi kalemo iwuta ihuṟuwi, nlyondi echiendie Mndumii mbeta tsiwi, ang'u malea hawi ha mbuna, kiwe nyi mwano foke fo wunyamaṟi wo woke alewuta; kimuho kya shilehesho nyi mwano fo wunyamaṟi, na kya kawi nyi kidaso kemaya modonyi.

⁸ Nao neshiendie mkohanyi, nawoke isembeṟa iya ya kuwoka ya mwano fo wunyamaṟi, nao nechimfunja nzingo, kyaindi nalamranduo njohawi tsiwi;

⁹ numa samu maata ya mwanofo fo wunyamaṟi nailetsie owarinyi lo rasionyi; na samu ingi yechitsuhaa yechiletsio wanda ya rasionyi; nyi mwano fo wunyamaṟi.

¹⁰ Numa kilehekyo kya kawi nechikilekia kiwe kidaso kekoṟa; chando ki kiwawase; nao mkohanyi nechimmbikia kisanza kipfa kya wunyamaṟi woke alewuta, nao nechihoṟio.

¹¹ Kyaindi nalaidime iwonambeta tsiwi, ang'u malea hawi ha mbuna, nlyondi echiende mwano yake kipfa kya idedolyo alelitehia, kienga kya ikumi kya efa ya mso mmamiri, kiwe nyi mwano foke fohoṟio wunyamaṟi; nalawikyoho mafuda huyafo, manya ubani wulahekioho; kyamba, nyi mwano fohoṟio wunyamaṟi.

¹² Nao nechiendie mkohanyi, nao mkohanyi nechiiraho ohi lo msofo iwe ngumbuo yake, na ifurumatsia rasionyi, huye ya mwano insengerie Mndumii kui modo; nyi mwano fohooṟio wunyamaṟi.

¹³ Na mkohanyicho nechimbikia kisanza kipfa kya wunyamaṟi wo woke sa kiidi kya isho aletehiaho kimu, nao nechihooṟio; na msofo fotsuhaa nyi fo mkohanyi, chando mwanofo fo mso fuwei.

Mwano fotalaa

¹⁴ Numa Mndumii kadeda na Mose, kambia,

¹⁵ “Mnducho oose katehia na iwuta wunyamaṟi alakusirie, kiidi kya mbonyitso njiele tsiwaṟi iwuto tsa Mndumii; nlyondi echiendie Mndumii mwano fotehia; isuwa liheṟemtsu lyiwuka mfiṟihenyi foke; kiheo kihianyi na iitala ochimṟehia lya shekeli tsa pesa, kui shekeli tsa handu haele, kipfa kya dekolyo lyake.

¹⁶ Nao nechilekia kipfa kya ikyo aledeko kya kindo kilya kiele, numa naengeṟieho kienga kya katanu, naenengie mkohanyi nao mkohanyi nechiwika kisanza kipfa kyake kui isuwalyo lya mwano fo wunyamaṟi, nao nechihoṟio.

¹⁷ “Na kokoya mndu awuta wunyamaṟi, na iwuta kimuho kya isho Mndumii aimie shilawuto, ma ko koya alaweichi, nyi mnyamaṟi-da, nao nechikudika wuwicho woke.

¹⁸ Nao nechiendie Mkohanyi isuwa lya mfiṟihenyi foke, lyiheṟemtsu, kiheo kihianyi na iitala echimṟehia, kiwe mwano fo wunyamaṟi, namseheṟie mkohanyi, na mkohanyi nechimbikia kisanza kipfa kya kindokyo alekitehia alakusirie, alamanye, nao nechihoṟio.

¹⁹ Nyi mwano fo wunyamaṟi; na kya lohi nawode mti oshangunyi lo Mndumii.”