WALEWI 17 - Bibilia Kui Mdedie fo Kimochi

Wuhendelyi wo samu

¹ Mndumii-Ruwa kawia Mose, kehamba,

² “Deda na Aroni, na wana wake, na wana wose wa Waisraeli, uwawie; Idedolyi nlyo Mndumii alelyiwawasia kehamba,

³ Mnducho oose o mba ya Waisraeli echishinja mmbe, ang'u kidahina kya ichondi, ang'u mburu, kiidi kya mfiṟihenyi, ang'u sa echimshinjia nja ya mfiṟiha,

⁴ manya nalemende na mongo fo ihema lyesanzia, kundu nalekie mwano ko Mndumii mongo fo ihema lya Mndumii; mnducho nechiitalo ke nawode mti fo samu; napusuo samu; na mnducho nechiletsano kuleshe na wandu wake;

⁵ kundu wana wa Israeli waende mwano yawo, waishinjie mademenyi, ee-da waendie Mndumii tane mongo fo ihema lyesanzia ko mkohanyicho, natsishinje tsiwe mwano fo ofoṟo ko Mndumii.

⁶ Nao mkohanyi nechiolia samu yake huya rasio lya Mndumii, mongo fo ihema lyesanzio na ikora mafuda hakyo, hawe opfamo lucha oshangunyi lo Mndumii.

⁷ Manya wechilekiase shiano shawo wainenge waṟumupfo, iwo wekewapfula kundu wawute nawo wuṟuhui. Iwawasolyi lyechiwa iwawaso lya mlungana kowo kishari numa ya kishari.

⁸ “Na iyo nochiwawia, Mnducho oose kiidi kya mba ya Israeli, ang'u kiidi kya wahenu, wekekaa nawo, ekelekia kidaso kekoṟa ang'u kidaso,

⁹ manya alaende na mongo fo ihema lyesanzia, kundu naisembeṟie ko Mndumii, kyasia mnducho nechiletsano na wandu wake.

¹⁰ “Na mndu oose o mba ya Israeli, ang'u kiidi kya wahenuwo wai kiidi kyawo, echinyo samu, ya mbaṟiyo yose, njechilema kyamu kyako koke mnducho ekenyo samu, na Inyi njechimkumba kuleshe na wandu wake.

¹¹ Kyamba moo fo mbihu nyi ipfo samunyi fui, na Inyi ngamuinenga nyo samuyo rasionyi, kundu muwike kisanza kipfa kya mrima yanu; kipfa nyi samuyo yekewika kisanza kipfa kya mrima yanu.

¹² Ko ikyo njilewia wana wa Waisraeli, kuwode momu mndu o konu nanyo samupfo, manya mhenu ai kiidi kyanu nalanyo samu.

¹³ “Mnducho oose ai o wana wa Waisraeli, ang'u o wahenuwo wai kiidi kyanu, sa echiwada indo lii na moo, ang'u ilehe lyekelio, kilasionyi kyake; nechipusuo samu yalyo, na iishikia terinyi.

¹⁴ “Kyamba kundu kui moofo fo indo nyi ipfo samunyi yalyo; ko ikyo njilewia wana wa Waisraeli, mulalye samu ya mbaṟi yose ya indo; kyamba moo fo mando hose nyi kiidi kya samuyo yaho; icho oose echiilya nechiletsano na wandu.

¹⁵ Kingise, orio mndu echilya mnying'a, ang'u nyama sa iraherahe nyi indo, kokoyanyi mndu amfee kiidi kyanu, ang'u nyi mhenu, nechisanja nguo tsake, nawesamba kose na mṟinga, nao nechiteṟefuka mṟasa kyukanyi; nlyondi echiheṟemka

¹⁶ indi kokoya alatsisanja, manya nalasambe kose nlyondi echikudika wuwicho woke.”