WALEWI 14 - Bibilia Kui Mdedie fo Kimochi

Iheṟemtso lya mndu aluo ndaṟe ya kichong'u

¹ Kiidima Mndumii-Ruwa kadeda na Mose, kambia,

² “llyi nlyo iwawaso lya msa awodo nyi saka, kiheri kya iheṟemtso lyake; nechiendo na ko mkohanyi,

³ na mkohanyicho nechicha na nja ya mfiṟiha; na mkohanyi nechiambuya, na kokoya ngapo ya saka yamechia ko icho awodo nyi saka;

⁴ nlyondi mkohanyicho echiwawasa kee waende kipfa kya icho aiheṟemtso shilehe shiwi shiheṟemtsu na mberi tsa ichondi tsa kimaande na hisopo;

⁵ numa mkohanyi nawawase kilehe kimu kishinjio kihienyi kya teri kii huya mṟinga fo medenyi.

⁶ Numa kilehekyo kii na moo nechikiwada kidikyo kya meresi, na mberitso tsa ichondi tsa kimaande na hisopo, nao nashikape samunyi ya kilehe kilya kishinjie huya mṟinga fo medenyi handu hamu na kilehe kilya kii na moo;

⁷ numa naolye mnducho aiheṟemtso saka ka mfungade nao nechihamba namheṟemtsu, numa nalekie kilehe kilya kii na moo kihende ngeṟenyi.

⁸ Na icho echiheṟemtso nechisanja nguo tsake, naode njui tsake tsose, nasambe na mṟinga nao nechiheṟemka; kamemarisa isho naideng'u na mfiṟihenyi, kyaindi nechikaa nja ya ihema lyake ko mfiri mfungade.

⁹ Kamemaa mfiri fo mfungade naode njui tsose tsa mdohu foke, na ngerero na mbawa tsa meso hake, njui tsake tsose nechitsioda, numa nasanje nguo tsake, nasambe mbihu foke mṟingenyi, nao nechiheṟemka.

¹⁰ “Naho mfiri fo nyanya naire masuwa hawi haawukie, na ihuṟuwi lyimu lya maka fumu lyiawukie, na shienga shiṟaṟu ko ikumi sha kilo 3 tsa mso mmamiri shiwe mwano fo mso, shilongolongo na mafuda, na shienga shiṟaṟu sha lita sha mafuda.

¹¹ Numa mkohanyi echimheṟemtsa nechimhoṟotsa mnducho aiheṟemtso, handu hamu na shindo shilya shose oshangunyi lo Mndumii-Ruwa mongo fo ihema lyekusanzia;

¹² numa mkohanyi nawade isuwa lyimuho na iliseheṟa lyiwe kidaso kya madeko, handu hamu na shienga sho shiṟaṟu sha mafuda, nashikuchekuche shiwe mwano fo kuchakucha oshangunyi lo Ruwa menyi wuitoṟi,

¹³ numa nashinjie ihuṟuwi handu heshinjia mwano fo wunyamaṟi na kidaso kekoṟa mmbenyi handu haele; cha kipfa chandu mwanofo fui fo mkohanyi, nyi wudo na mwano fo wunyamaṟi fui mwele ngoseṟa.

¹⁴ Mkohanyi naire samu kitutu ya mwanofo fo wunyamaṟi, nao mkohanyi naishie kudu ko kulyo ko icho aiheṟemtso na kufui na kimnyo king'anyi kyake kya owoko loke lo kulyo, na kimnyonyi kyake kinganyi kudendenyi ko kulyo.

¹⁵ Numa mkohanyi naire mafuda ipfo sheengenyi shake sha mafuda, nahaletsie ohinyi lo owoko loke amonyi lo kumoso;

¹⁶ mkohanyi nakape kimnyo kya owoko lo kulyo ipfo mafudenyi, hai owokonyi loke lo kumoso, naole mafudaho na kimnyo kyake ka mfungade oshangunyi lo Ruwa menyi wuitori.

¹⁷ Na kiidi kya mafuda halya hatsuhaa owokonyi loke mkohanyi nahatoṟe kudu ko kulyo ko icho aiheṟemtso, na kimnyonyi kinganyi kya owoko loke lo kulyo, na kimnyonyi kyake king'anyi kya kudende koke ko kulyo, kya samu ya mwano fo madeko;

¹⁸ na mafuda hatsuhaa, hai owokonyi lo mkohanyi, nechihaletsia mdohu fo icho aiheṟemtso;

¹⁹ na mkohanyi nechiwika kisanza kipfa kyake oshangunyi lo Ruwa menyi wuitori.

²⁰ Numa kipfa kya icho aiheṟemtso kipfa nateṟefukie; numa nashinje kidaso kekoṟa, na mwano fo mso alya rasionyi; na mkohanyi nawike kisanza kipfa kyake, nao nechiheṟemka.

²¹ “Kyaindi kokoya nai mkiwa, na elechiidama iwona kiheokyo, nlyondi echiira kidahina kya kisuwa, kiwe mwano fo madeko fo kuchakucha, kundu nawike kisanza kipfa kyake, na kienga kya ikumi kya efa ya mso mmamiri, fumlongelonge na mafuda shiwe mwano fo mso na sheenga shiṟaṟu sha mafuda.

²² Naende mbuna tsiwi angu malea hawi ha mbeta chandu aidima ihawona; ilyo lyimu lyechiwa mwano fo wunyamaṟi na ilyo lya kawi lyiwe kidaso kekoṟa.

²³ Mṟasa mfiri fo nyanya nechihaendie mkohanyi mongo fo ihema lyesanzia oshangunyi lo Ruwa menyi wuitoṟi kipfa kya iheṟemka lyake.

²⁴ Na mkohanyi nechiira ichoondilyo lya mwano fo wunyamaṟi, na shienga shiṟaṟu sha mafuda, na mkohanyi nechishikuchakucha shiwe mwano fokuchakucha oshangunyi lo Ruwa menyi wuitoṟi.

²⁵ Numa nashinje ichoondi lya mwano fo wunyamaṟi, na mkohanyi naire samu yo ya mwano fo wunyamaṟi, na iiwika alya kimdohu kya kudu ko kulyo ko icho aiheṟemtso, na ohinyi lo kimnyo king'anyi kya owoko loke lo kulyo na kimnyonyi king'anyi kya kudende koke ko kulyo.

²⁶ “Numa mkohanyi naletsie mafuda matutu ohinyi lo owoko loke o amonyi lo kumoso,

²⁷ numa mkohanyi naolie kienga kya mafudaho hai owokonyi loke lo kumoso, na kimnyo kyake kya owoko loke lo kulyo ka mfungade oshangu lo Mndumii;

²⁸ mkohanyi nawike hengi kiidi kya mafudaho hai owokonyi loke kimdo ko kudu ko kulyo ko icho aiheṟemtso, kimdo kya kimnyo king'anyi kya owoko lo kulyo, na kimnyonyi king'anyi kya kudende koke ko kulyo huya handu halya kuwode samu ya mwano fo wunyamaṟi;

²⁹ na mafuda haletsuhaa owokonyi lo mkohanyi nahawike mdohu fo icho aiheṟemtso, kundu nawike kisanza kipfa kyake oshangunyi lo Ruwa menyi wuitori.

³⁰ “Numa nasembeṟie mbetatso imuho, ang'u maaleaho ha mbeta chandu aleidima ihawona.

³¹ Na chandu akuidimia, lyimu lyiwe mwano fo wunyamaṟi, na lya kawi lyiwe kidaso kekoṟa, handu hamu na mwano fo mso; na mkohanyicho nechiwika kisanza kipfa kya icho aiheṟemtso oshangunyi lo Mndumii.

³² Icho sa ngapo ya saka ii kiidi kyake, na msa elechiidima iwona ikyo kimbaṟi kya iheṟemtso lyake, kindo kimbaṟi nyi ikyo.”

Kuṟushi ya mba

³³ Mndumii-Ruwa kadeda na Mose na Aroni, kawawia,

³⁴ “Ilyi mochiida na orukenyi lo Kanaani, sa njimuinenga luwe kyoṟa kyanu, na inyi ili njechiwika ndaaṟe ya saka mmbenyi ya orukalo lo kyoṟa kyanu;

³⁵ nlyondi menyi mbayo echihendia mkohanyi nammbie, ‘Ngawona Inyi cha ili kee kui ndaaṟe kulya mba koko.’

³⁶ Nlyondi mkohanyi echiwawasa kee waire nzohoṟa tsose tsii ipfo mba, oshangunyi lo mkohanyi alameida na mba iambuya ndaaṟeyo, kundu shose shii ipfo mba shilateṟefutso; numa lyefurumia mkohanyi naide na mba naiambuye;

³⁷ nao nechiambuya ndaaṟeyo, ambuya kokoya ngapoyo ikeri ipfo mawandenyi ha mba, naho hapaṟikiepaṟikie fana ya kimaṟamaṟa ang'u ha kimaande maṟunguho hakasoṟowia kota mawandaho;

³⁸ nlyondi mkohanyi echiida na nja mṟasa o mongo fo mbayo, naishinge mbayo ko mfiri mfungade.

³⁹ Mkonu fo mfungade mkohanyi nahendese, nao nechiambuya; ambuya kokoya ngapo yadung'ana mawandenyi ha mbayo;

⁴⁰ nlyondi mkohanyi echiwawia wawutepfo mahoho hawode ngapo; na ihakumba handu kokekumbo mbuṟo nja ya mṟi;

⁴¹ nao nechihamba mbayo iariso kyamba njora tsose, na chokaa wechiiarisapfo wechiipusuya nja ya mṟi handu kokekumbo mbuṟo;

⁴² numa waende maho hengi, wahawike handu halya wawutapfo; nao nechiende chokaa ingi nashie mbayo.

⁴³ “Na kokoya ndaaṟeyo yawuyase ikachea mba iya, mandi o ameirapfo maho halya, na mandi amemaa iarisa mba, na amemaa ishiapfo chokaa ingi;

⁴⁴ nlyondi mkohanyi echiida na mba naiambuye, ambuya kokoya ndaaṟe idung'anyi mbayo, nyi saka iilya mbayo, nyi iteṟefukie.

⁴⁵ Nao nechiiwunduo na maho hayo, na shidi shayo, na chokaa yose ya mbayo; nao nashiduo shose nja ya mṟi mṟasa handu hekekumbo mbosha na mbuṟo.

⁴⁶ Kingise mndu echiida na ipfo mba kiherikyo kyose iwei injishinge nechiteṟefuka mṟasa kyukanyi.

⁴⁷ Na mndu echilaa ipfo mba nechisanja nguo tsake na mndu echiliia kelya ipfo mba nechisanja nguo tsake.

⁴⁸ “Kingise kokoya nyi mkohanyi aida napfo na iambuya, kokoya ndaaṟe ilaledung'ana ipfo mba, mba yammaa ishio chokaa; nlyondi mkohanyi echihamba kee mbayo injiheṟemtsu, kyamba ndaaṟe iya ilesalaa.

⁴⁹ Nao nechiira shilehe shiwi, na kidi kya meresi, na mberi tsa machondi tsa kimaande, na hisopo, naheṟemtse mbayo;

⁵⁰ nao nashinje kilehe kimuho nashinjie kiwenyi kya teri kii huya mṟinga fo medenyi.

⁵¹ Numa naire kidikyo kya meresi, na hisopo, na mberi tso tsa machondi tsa kimaande, hamu na kilehekyo kii na moo, naishitoṟe shose samunyi ya kilehe kilya kishinje, na kulya mṟingenyi fo medenyi, naolie mba ka mfungade.

⁵² Nao kudo nechiiheṟemtsa kui samu ya kilehe na kui mṟinga fo medenyi; na kui kilehekyo kii na moo, na kui kidi kya meresi, na kui hisopo; na kui mberitso tsa machondi tsa kimaande.

⁵³ Kyaindi kilehekyo kii na moo nechikilekia kihende nja ya mṟi kihende ngeṟenyi; nyi wudo echiwika kisanza kipfa kya mbayo; nayo yechiheṟemka.

⁵⁴ “Ilyo nlyo iwawaso lya ndaaṟe ya saka ya orio mbaṟi na ya paṟi;

⁵⁵ na ya saka ya ṟao, na saka ya mba;

⁵⁶ na nzindo, na ya kikoko na ngoru iwaa;

⁵⁷ kundu ikulosha kokoya nyi iteṟefuka na ili kechiheṟemka; ilyo nlyo iwawaso lya saka.”