WACHILI 15 - Bibilia Kui Mdedie fo Kimochi

¹ Komeidaho mkonu maata, kiheri kesambuo Ngano, Samsoni kaduo kidahina kya mburu, kahenda iiṟikiṟa mka oke. Kawia ndeye o mka ke nakundi iwona mka oke kiṟihenyi koke. Indi ndeye o mka nalamnenge momu,

² kambia, “Inyi njilekusaṟa ke nolemsuo piu. Ko ikyo njilemwalikia mbuya ya yapfo. Manya kudo, manawo nakeri iya namcha kota o. Hoi ulakuso, umwaalike handu hake.”

³ Samsoni kambia, “Ambuya ngasamba mawoko, njiwode kita ko shilya njechiwutia Wafilisti pfo.”

⁴ Kyasia Samsoni kahenda kawada mapara mahana haṟaṟu (300) kahapfunga mṟehese yaho hawi hawi. Kiidima kawika ho kimui o makidihawi ha mrehese yo kawesanza ho na maṟa maumu irio mapaara hawi.

⁵ Amemarisa ado kataruo modo kahalekia hakadichia mademenyi ha Wafilisti hakakoṟa Ngano iwei yesambuo na iwei shiwuhenyi kimu na iya ilawemesambuyo mṟasa na msinepfu shikarumara shose.

⁶ Wafilisti kiheri wawekundi imanya ichu alewuta adi wakawio, “Nyi Samsoni cho mii o mana o Mtimna, nawuta ado kipfa ndeye o mka naleduo mana cho kamwalikia mkaṟa o Samsoni mbuya yake ya walyi.” Kyasia Wafilisti wakakoṟa modo mka ulya na ndeye oke.

⁷ Samsoni kawia Wafilisti wo, “Kokooya nyi wudo mulewuta, ngalya nyamu ke njechikure iya sile ngataa kiṟache pfo.”

⁸ Kyasia kawasaṟikia ilyi iwicho kawaha wafoi. Kahenda kakaa kiidi kya opanga lo Etamu.

Samsoni awinga Wafilisti

⁹ Wafilisti wakacha, wakawika kiṟaṟo kyawo orukenyi lo Yuda wakasaṟikia mṟi fo Lehi.

¹⁰ Wandu wa Yuda wakawawesa, “Nki ili mocha ilukapa?” Nawo wakahaluo, “Locha kundu lupfunge Samsoni na immbutia chandu o aleluwutia.”

¹¹ Kyasia, wandu shiku shiṟaṟu (3,000) wa Yuda wakahendia Samsoni kulya opangenyi lo iṟaṟa lo Etamu wakambia, “Uichi ke Wafilisti waluitoṟia? Ambuya ng'u singiri i uleluendie!” Samoni kahaluo, “Chandu walenjiwutia nyi wudo njilewawutia.”

¹² Wakambia, “Locha lukupfunge kundu lukudambikie mawokonyi hawo.” Samsoni kawawia, “Njilyienyi nyamu ke nyo muwenyi mochinjiwaha pfo.”

¹³ Nawo wakambia, “So lochikuwaha pfo, indi lochikupfunga na ikudambika mawokonyi hawo.” Kyasia wakampfunga na shiwoho shiwi shihya na imbuta ipfo opangenyi.

¹⁴ Kekishika Lehi, Wafilisti wakacha wechidicha na ikapa kitohio. Peṟeseng'u mumuyo fo Mndumii-Ruwa fukasokia Samsoni na shiwoho shilya wawepfungie nasho Samsoni mawoko hake shikawa cha kitanyi kyaitso modonyi, na shilya shiwempfungie shikaoloka wanda.

¹⁵ Samsoni kawona ohundu lo nzoi luwishi kaluira kawaha nalo wandu kiku kimu (1,000).

¹⁶ Kiidima Samsoni kahamba, “Kui ohundu lo nzoi, ngawaha wandu kiku kimu (1,000), Kui ohundu lo nzoi, ngasanyia fumvu lya mnying'a.”

¹⁷ Kekimaa ideda ado, kakumba ohundu lulya. Handu kukelaho Ramath-lehi, kimu cha ilyi ohamba fumvu lya ohundu.

¹⁸ Kyasia Samsoni kaangaa mnu. Katerewa Mndumii-Ruwa, kechihamba, “Hoi Ruwa, nyi iyo uleende okiṟo lu, kui owoko loko mṟundi opfo. Ngesa wulalu nochinjida na wuangari wu wunjiwahe na iwado nyi Wafilisti wa walawadine?”

¹⁹ Ruwa kaṟuhuo handu kuwewode ṟungu ipfo Lehi, kukowada mṟinga. Samsoni kanyo mṟinga fo kawuuyo nyi moo. Soka yo ikalaho nyi En-hakore; nayo ikeri ipfo Lehi mṟasa inu.

²⁰ Samsoni kawa mchili kiidi kya Waisraeli maka makumi hawi (20), kiheri kya Wafilisti.