TITO 1 - Bibilia Kui Mdedie fo Kimochi

¹ Inyi Paulo njii singa lya Ruwa na msu o Yesu Kristo moṟundya mwidikye fo wasambuṟe wa Ruwa na mmanyishie fo wu-kilohi wusumhanye wuindi.

² Njikuwode na owedo loiweda moo fo mlungana ifu Ruwa chu alai mowongo alemteseheṟya matsika halya maheri halunganyi halawemche.

³ Kya indi matika halya haweshikie nyi alemanyisha idedo lyake kui mwongoye njiimdambikye inyi na wuitiki wo iwawasa lya mletsi odu Ruwa.

⁴ Ngaiṟikiṟa Tito mana ichu oko o lohi kui wuidiki luwode wumu luwawi. Wutonga wuwe wopfo na ofoṟo lowuka ko Ruwa Wande na Kristo Yesu mkiṟi odu.

Iṟunda lya Tito Krete

⁵ Kitewe kilennenga ngakuda kulya Krete nyi kundu umarise isungusia shilya shiwetsuhae shesungusia nohende iwika-pfo wameku orio mṟinyi yose njia iya njilekuwawasya.

⁶ Kokoya kuwode ai mteechi, mii o mka umu, awode wana waidikye, wawode wuindi na walawode wuwichi wose.

⁷ Kyamba moambuya siṟi kimbari nawe mndu mteechi akerye Ruwa cha mwiṟichi alawode tumbe, alai mlang'a ma makinango ma manzina ma mongula.

⁸ Kya indi nawe mokunda wahenu, achihianyi na hai mecha, mndu o osaaṟe mhoṟotsu, menyi wuindi, mndu msanze.

⁹ Nawe mokuwada na idedo liidikyanyi necha na kiloshyo kilya, kundu naidime iikimba na mweke fo wupfundi wochiṟa mrima na iwinga walya wekefurunja mbonyi.

¹⁰ Kyamba kwipfo wafoi wawode okuchu wenyi madedo ha melemele wai walembi, mnu nyi walya wa mkambo mdine.

¹¹ Kyawo na kikaki wahende ifunjo olimi. Nyiwo wandu wekepihisa nja tsa wandu tsii nsanze ili wailosha shindo shilasumhanyi wai watewe nyi ngula tsawo.

¹² Umu owo, mwikimbi owo wa wenyi awehambie wai; Wakreta wai wawongo na kamu, mando malang'a, mandeu madoko.

¹³ Kiṟingishyo ki kikeri lohi. Nkyo kitewe uwadedye kyumu kundu wahendechia wuidikinyi.

¹⁴ Walahendekuwada na mhambo ya Kiyuda na mawawaso ha wandu iwa weindukya kiwulohi mhongo.

¹⁵ Shose shiharamie iwo waharami, indi kya walya wafanyi walaidikye kwipfo kiwaharamie ma kimupfo, kya indi wai wafanyitse na mhie ya mdo na ngo tsa mrima.

¹⁶ Wekehamba ke waichi Ruwa wai, indi nyi imkana wakeri kui mawuto halya. Wada owicho, wandu walehi walawa iṟunda kindo ki kicha ma kimu.