SHIIMBO SHA DAWIDI 97 - Bibilia Kui Mdedie fo Kimochi

Ruwa mwitoṟi ang'anyi

¹ Mndumii naikolonyie! Wuyana wuadapfume! Shianda shifoi shichihio!

² Mapuchi na meema shimtengetia; wusumhanyi na mwanduye nyi otende lo kidi kyake.

³ Modo fokesonguo mbele yake, nafo fokekombetsa watuuri wake njoora tsose.

⁴ Olewo lofo lukawaaya wuyanenyi, oruka lukawona lukadedema.

⁵ Mafumvu halesalaa cha muo oshangunyi lo Mndumii, oshangunyi lo Mndumii o wuyana wose.

⁶ Maruwehu halehamba kiilohi kyake, na wandu wose walewona kiṟumi kyake.

⁷ Waendio iṟeenze wose wekeindia maruwa ha wongo; wekekuichika na shindo shilawode kiira; lanye maruwa hose, mwichikyenyi O.

⁸ Sioni ileicho na ichihio, wana wa kika Yuda waleadapfuma, kipfa kya mwanduye yapfo, hoi Mndumii.

⁹ Kyamba Iyo, Mndumii, nyio ui huye, huye mnu kota wuyana wose; kuleichiko mnu huye ya maruwa hose.

¹⁰ Lanye mkundi Mndumii, suoni wuwicho. Nekeringa mrima ya waheṟemtsu wake. Na iwaashuo mawokonyi ha walai na wusumhana.

¹¹ Ngeela ilewaaya menyi wusumhanyi, na sia waheṟemtsu wa mrimenyi.

¹² Lanye musumhanyi, chihionyi kya Mndumii; na iana rina lyake liele.