SHIIMBO SHA DAWIDI 96 - Bibilia Kui Mdedie fo Kimochi

Ruwa mangi na moanduya

¹ Imbienyi Mndumii kiimbo kihya! Imbienyi Mndumii, wuyana wose!

² Imbienyi Mndumii, wikienyi rina lyake mboṟa. Onguonyi okiṟo loke mkonu kui mkonu.

³ Waongoyenyi mkambo ya wandu mbonyi tsa kiṟumi kyake. Na wandu wose mbonyi tsa maṟiho hake.

⁴ Kyamba Mndumii nyi ang'anyi menyi kiṟumi mnu. Na nawaṟi iowuyo kota maruwa hose.

⁵ Kipfa maruwa hose ha wandu chi kindopfo, kyaindi Mndumii nyio alewika ruwehu.

⁶ Wuindi na kiichiko shikeri oshangunyi loke; pfinya na kiweṟe shii kiidi kya handu hake haele.

⁷ Inengienyi Mndumii, lanye mbaṟi tsa wandu, inengienyi Mndumii kiṟumi na pfinya.

⁸ Inengienyi Mndumii kiṟumi kya rina lyake, endenyi mwano muide na ipfo mfiṟihenyi yake.

⁹ Indienyi Mndumii kui kiweṟe na wuele, dedemenyi oshangunyi loke, wuyana wose.

¹⁰ Hambenyi ko wandu wa mkambo, “Mndumii naikolonyie! Ee da, wuyana wuwuṟihike wulasingide, nechianduya wandu kui sungusihu!”

¹¹ Maruwehu hachihio, oruka luadapfume! Ipalyipalyi lyidihine na shose shiichuṟiepfo.

¹² Madema haadapfume, na shose shiipfo, nyi lyondi mashidi ha ngeṟenyi hechiimba na sia;

¹³ Oshangunyi lo Mndumii, kipfa naicha, kyamba naicha ianduya wuyana. Nechianduya oruka kui sungusihu, na mkambo ya wandu kui wuhendeli woke.