SHIIMBO SHA DAWIDI 94 - Bibilia Kui Mdedie fo Kimochi

Ruwa moanduya wose

¹ Hoi Mndumii-Ruwa o kiṟache, Ruwa o kiṟache, ukuloṟe!

² Menyi moanduya wuyana, ukuichike; uinenge iwo wawode wutimbiri kiwasumhanyi.

³ Mndumii, tane indi Walai wa wusumhanyi, mṟasa indi walai wawusumhanyi wechikapa ngululu?

⁴ Ngesa! Wose wewuta mawicho wechideda madedo, na ihamba ikushela na iwika wutimbiri?

⁵ Ewo Mndumii, waipeṟehetsa wandu wapfo; wailisa luwa lyapfo wukiwa.

⁶ Wakeri iwaha mkusu na mhenu; waiwaha mngoeda.

⁷ Nawo waihamba, Mndumii awonyipfo; Ruwa o Yakobo ekyekusaṟapfo.

⁸ Lanye matondo mui kiidi kya wandu, kusaṟenyi? Lanye masembo, nyi indi mochiwada wuṟango?

⁹ Msa alewika kudu handu halyo alaicho? Msa alewumba riso nalawone?

¹⁰ Eketoromisha mkambo ya wandu nalapomie? Msa ekelosha mndu o wandu nalamanye?

¹¹ Mndumii naichi mahio ha mndu Ke nyi wulya.

¹² Ee wo Mndumii, nanga mndu ulya okemtoromisha, na imlosha kui iwawaso lyapfo;

¹³ Kundu namnenge ofoṟo mfiri ya mawicho; tane alai na wusumhanyi echisumio ṟungu.

¹⁴ Kyamba Mndumii echikumba wandu wakepfo, manya echilekia wa kyoṟa kyakepfo.

¹⁵ Kipfa mwanduye fochiwuuya wukiilohi, na wose wawode wuhoṟotsu wo mrima wechiwuosha.

¹⁶ Nyiu echihoṟoka? Kipfa kyako huyawawicho? Nyiu echinjitarama ko iwo wekewuta mawicho?

¹⁷ Kokoya Mndumii alawei, kitarama kyako, nuwekoya ngamehenda ko wapfu.

¹⁸ Lyilya njilehamba, Kudende koko kuirendia; hoi Mndumii, wuoloru wopfo wulenjiṟihika.

¹⁹ Kiidi kya mfoeṟa fo makusaṟo mrimenyi foko, iwihiṟia moo lyapfo lyichihiṟie ngoo yako.

²⁰ Ngesa! Kidi kya wukiika kuwode kita na iyo, Kekeokia mtambo kui iwawaso?

²¹ Kekeṟinjawia mrima fo mndu o wusumhanyi, na ianduya samu ilawode mti.

²² Kya indi Mndumii nawei omombo loko, na Ruwa oko iṟaṟa lyako lyedichia.

²³ Nao nechiwawihiṟia wunyamaṟi wowo, nechiwarumatsa kiidi kya wuwicho wowo, ee da, Mndumii, Ruwa odu, nechiwarumatsa.