SHIIMBO SHA DAWIDI 92 - Bibilia Kui Mdedie fo Kimochi

Kiimbo keṟumisha Ruwa

(SHIIMBO. Kiimbo kya mkonu fo Sabato)

¹ Nyi idedo lyicha iana Mndumii; na iimbia rina lyapfo, Hoi Ui huye.

² Ionguo wuoloru wopfo ngamenyi, na wuhendeli wopfo kiheri kya kio.

³ Kui kihia kiwode ndusu ikumi, na kui ṟu lya kinanda, na kui mdihino fo kinubi.

⁴ Kipfa kya ichihiṟa Mndumii, kya iṟunda lyapfo, njechiichika kipfa kya mawuto ha mawoko hapfo.

⁵ Hoi Mndumii, chando mawuto hapfo hai manene! Makusaṟo hapfo nyi semeṟi tsing'anyi.

⁶ Mndu ai tondo ekyemanya ishopfo, manya isembo lyekehamanyapfo.

⁷ Walai wa wusumhanyi wakaaluka cha maṟa, na wose wekewuta mawicho wakaṟimba, nyi kundu wakombetso mlungana.

⁸ Kya indi iyo, Mndumii, ui Mwele tane mlungana.

⁹ Kyamba wakituwa wo wapfo, Hoi Mndumii, wakituwa wo wapfo wechideka, na wewuta mawicho wose wechipaṟakana da.

¹⁰ Kyaindi ombe loko kuleluiria cha ombe lo mboho. Njileshio mafuda mawishi.

¹¹ Na riso lyako lilewaambuya wawenjialie, kudu koko kukaicho mbonyi tsa wawicho walenjisaṟikia.

¹² Mndu o wusumhanyi nechiṟimba cha ikangachi; neching'ana cha mweresi fo Lebanoni.

¹³ Waledongio mbenyi ya Mndumii, wechiṟimba ipfo mfiṟihenyi ya Ruwa odu.

¹⁴ Wechikumbia ndunda tane kiheri kya wuku, wechiwada poru na ing'ana necha.

¹⁵ Waonguo ke Mndumii nyio menyi wusumhanyi, iṟaṟa lyako, ipfo kiidi kyake kuwode mbakapfo.