SHIIMBO SHA DAWIDI 91 - Bibilia Kui Mdedie fo Kimochi

Ruwa mringi odu

¹ Adamie handu ha kiṟika hake Ai huye, Nechikaa kiidi kya maṟinje ha Mndumii menyi pfinya.

² Njechihamba, “Mndumii nyio kidichionyi kyako na omombo loko, Ruwa oko njechimkusiria!”

³ Kyamba o nechikuashuo mdehonyi fo wadehi, na kiidi kya iwaawe lyekyenyamaṟa.

⁴ Kui mafuru hake nechikushikya Shi ya makungo hake nochiwona hedichia; wuhendeli woke nyi ngawo na, ohawi.

⁵ Ochiowuo wuowo wo kiopfo, manya mfi forunduka mfiripfo,

⁶ Manya iwaawe lyeida memenyipfo, manya mrike fokenyamaṟa mfiripfo.

⁷ Ma kokoya wandu shiku waweho owarinyi lopfo. Ee da, shiku ikumi owoko lopfo lyo kulyo. Manya kudo wechikusembelia iyo pfo.

⁸ Indi kui meso hapfo nochiambuya; na iwona kiṟache kya walai wasumhanyi.

⁹ Kipfa Iyo Mndumii nyi iyo kidichionyi kyako; notanyie ichu Ai huye handu hapfo hekaa.

¹⁰ Mawicho hechikukoya iyopfo. Manya iwaawe lyechisembelia ihema lyapfo-pfo.

¹¹ Kyamba nechikudikia wamalaika wake; wakuringe njienyi tsapfo tsose.

¹² Mawokonyi hawo wechikuduo, kulawone ochikapa mtulia kudende kopfo ihohu.

¹³ Nochichumachuma miiso na njoka, ialea lya miiso na njoka nochiwapoṟipotsa kui madende.

¹⁴ Kipfa kya ili alewanza injikunda; njechimkiṟa; na imbika handu kukuirie huye, kipfa alenjimanya Rina lyako.

¹⁵ Nechinjilaha na inyi njechimwidikia, njechikaa handu hamu nao maukiwenyi, njechimkiṟa na imng'anyisha.

¹⁶ Kui maheri hafoi njechimwihutsa, na inyi njechimloṟa okiṟo loko.