SHIIMBO SHA DAWIDI 9 - Bibilia Kui Mdedie fo Kimochi

Iana Ruwa

(Ko msongoru o waimbi:kui ofano lo Muth-labeni. Shiimbo sha Dawidi)

¹ Njechiana Ruwa na mrima foko fose, Njechionguo mawuto hapfo hose ha kiṟiha.

² Njechichihiyo na ikesa kipfa kyapfo, Njechiimbiya Rina lyapfo, Iyo Ui huye.

³ Kipfa wakituwa wako wawuya numa, wakapa mtulia na irumara, oshangunyi lopfo

⁴ Kipfa nyi ulenjidumbuya mondu, kya sumhana, Nyi udamie loṟikehu lo wuitoṟi kochianduo kisumhanyi.

⁵ Ulededia wandu wa mkambo korumatsa mtahachi koangatsa rina lyawo maheri hose halunganyi.

⁶ Wakituwa watsitsa wakadeo wangoeda mlungana, Na Mṟi yawo nyi uleikuṟuo, Na ngumbuo yawo ikadeka.

⁷ Indi Mndumii nyi echikaa mlungana, Nyi ateseheṟye loṟika loke loanduya.

⁸ Nao nyi echianduya wuyana kui kii lohi, Nyi echidumbuo kya wandu kui sungusihu.

⁹ Mndumii nyi ai omombo ko icho ammine, Ee da, Omombo kiheri kya kiwi.

¹⁰ Na walya waichi rina lyapfo wakusirie kopfo, Kipfa Iyo Mndumii, ulaleda walya wekuwalya.

¹¹ Imbienyi Mndumii ai kulya Sioni, Onguonyi mbonyi tsake masangenyi kose.

¹² Motaa kiṟaache kya samu nawekumbuo, Alehadima kifuhiyo kya wafafa-pfo.

¹³ Iyo Mndumii unjisaṟie Ambuya matuuro njikeri ituuro nyi walya wanjisuo. Iyo nyi okenjiwuta kichuminyi kya opfu.

¹⁴ Kundu njionguo kiṟumi kyapfo kyose, Ipfo shichuminyi sha mana o Sioni, Njechichihiṟo nyi okiṟo lopfo.

¹⁵ Wandu wa mkambo walesoṟowia ṟungunyi, walisumie, Ndusu tsinjioke maṟaushi watsiṟikie tsiledeha madende hawo.

¹⁶ Mndumii nyi akuloṟa kainutsya mwanduye; Nyi adeha mtahachi kui maṟunda ha mawoko hake.

¹⁷ Watahachi wechiwuya na ko wapfu, Ee-da, wa mkambo yose wahadimie Ruwa.

¹⁸ Kyamba msa awuṟie echihadimopfo. Kikusiryo kya wafafa kechideka ma indi-pfo.

¹⁹ Mndumii, hoṟoka, mndu o wandu nalawade pfinya. Wandu wa mkambo waanduyo oshangunyi lopfo.

²⁰ Mndumii, kyewaendie ṟiho wandu wa mkambo wamanye ke wai wandu.