SHIIMBO SHA DAWIDI 89 - Bibilia Kui Mdedie fo Kimochi

Kiimbo kiheri kya wukiwa wo mkambo

(Kiimbo kya Ethani Mwezrahi)

¹ Woloru wo Mndumii njechiwuimba mlungana; kui dumbu lyako njechimanyisha luwa lyose wuhendeli wopfo.

² Kipfa njilehamba, wuoloru wopfo wuwanzi mlungana; wuhendeli wopfo wuwanzi cha ruwehu.

³ “Njilewika mkundano na msambuṟe oko, njileliia Dawidi nyamu, mṟundi oko.

⁴ Wufee wopfo njechiwuikara mlungana, njechiwika loṟika lopfo lo wuitoṟi tane mlungana.

⁵ Hoi Mndumii, ruwehu tsechiichika ṟiho tsapfo, wuhendeli wopfo kiidi kya kisanzio kya waele.

⁶ Kipfa nyiu ipfo ruwehu echiidima ihiyanyisho na Mndumii? Nyiu afananyi na Mndumii ipfo kiidi kya wamalaika?

⁷ Ruwa naoweshie mnu mengenyi ya waele, naoweshye kota wose wamtengetie.

⁸ Mndumii, Ruwa o matorito, nyiu ai ngohoda cha iyo, Hoi Mndumii-Ruwa? Na wuhendeli wopfo wukutengetie.

⁹ Iyo nyio uikolonyie wutimbiri wo ipalyipalyi; masinanu halyo hakakuira nokehailamia, iyo.

¹⁰ Nyi iyo kulepoṟipotsa njoka Rahabu na iliwaha, kui owoko lukahaṟi kopaṟatsana iwo wakusuo.

¹¹ Ruwehu nyi masaa hapfo, oruka nalo na masaa hapfo. Wuyana na shose shiichuṟiepfo; nyi iyo kuleweha otende loke.

¹² Mtsudu na nuka nyi iyo kuleshiwika, Tabori na Hermoni wekechihiṟo nyi rina lyapfo.

¹³ Owoko lopfo nyi owoko luwode wuidimi; owoko lopfo luwode pfinya; owoko lopfo lo kulyo luwode kiṟumi!

¹⁴ Wusumhanyi na mwanduye nyi otende lo kidi kyapfo; wuoloru na wukiilohi shiisembelia oshangunyi lopfo.

¹⁵ Nanga wandu walya waichi ṟu lya sia. Ewo Mndumii, wekechumia kiidi kya sa ya kyamu kyafo.

¹⁶ Kipfa kya rina lyapfo wekyechihio mfiri puti; na kipfa kya wusumhanyi wopfo wekeichiko.

¹⁷ Iyo nyi kiṟumi na pfinya tsawo; na kui ikunda lyapfo lochiwinga.

¹⁸ Kyamba ngawo yadu ii na Mndumii; na mangi yadu nawukie kopfo iyo mwele o Israeli.

Kyasa kya Ruwa ko Dawidi

¹⁹ Nlyondi kulewia waele wapfo kui ndodo, “Kohamba, njileinenga ai ngohoda kitarama; ngang'anyisha msa alesambuṟo kiidi kya wandu.

²⁰ Njilewona Dawidi, mṟundi oko, ngamshia mafuda hako maele.

²¹ Ichu owoko loko lochiwanga koke, na owoko loko lochimbikia pfinya.

²² Wakituwa wechimbonyiase-pfo, manya wandu wawicho wechimturapfo.

²³ Kyaindi njechipoṟipotsa watuuri wake oshangunyi loke, njechikapa iwo wamsuo.

²⁴ Wuhendeli woko na wuoloru woko nechikaa nasho; na kui rina lyako ombe loke loching'anyisho.

²⁵ Njechihekia owoko loke huya ipalyipalyi, na owoko loke lo kulyo huya meda.

²⁶ O nechinjilaha, ‘Iyo wande oko, Ruwa oko na iṟaṟa lya okiṟo loko.’

²⁷ Na inyi njechimsumba nawe wuwee woko; nakae huye mnu kota wamangi wa wuyana.

²⁸ Tane mlungana njechimbikia wuoloru woko, na mkundano foko njechifuwika kiilohi koke.

²⁹ Luwa lyake nawo njechiwaṟihika mlungana, na loṟika loke lo wuitoṟi cha ruwehu.

³⁰ Wana wake wakada iwawaso lyako, walachumie kiidi kya mdumbuye yako.

³¹ Wakatehia mawawaso hako, walawade wuikimbi woko.

³² Nahong'u, njechitoromisha madeko hawo kui olio, na mawicho hawo kui ngapo.

³³ Kyaindi wuoloru woko njechimsoka o-pfo; manya njichihaluo wuhendeli woko wuwe wongopfo.

³⁴ Inyi njechitehia mkundano fokopfo, njechiilacha idedo liwukie dumbunyi lyakopfo.

³⁵ Idedo limu njilelya nyamu kui wuele woko; kyalohi njechiwia Dawidi wongopfo.

³⁶ Wufee woke wochikaa mlungana, na loṟika loke lochiwa cha mnengeri oshangunyi loko.

³⁷ Lochiṟingishio mlungana cha meri; mṟingishi ai mhendeli nginehu.”

Fowa ya wulalu

³⁸ Kyaindi nyi iyo Mndumii kulemkumba na imleha, kopufukia mshimbuo opfo.

³⁹ Kulesukio kya mkundano fo mṟundi, opfo, koshia ngafu oṟo yake na iikumba wanda.

⁴⁰ Kulewunduo mamfiṟiha hake hose, kohaluo mamfiṟiha hake cha mamrapu.

⁴¹ Iwo wose wekeida o njienyi wekeduo masaa hake, kawa kindo kipiṟe ko wamṟasa wake.

⁴² Kuleṟumisha owoko lo kulyo lo watuuri wake; kochihiṟa wose wamsuo.

⁴³ Kowewihiṟa numa wuohi wa oshu loke, manya kulemhoṟotse shidenyipfo.

⁴⁴ Kuletoromisha wulole woke; loṟika loke lo wuitoṟi koluolotsa wanda.

⁴⁵ Kuleanguṟa mfiri ya urika woke; komṟika sonu.

Iterewa ofoṟo

⁴⁶ Ewo Mndumii, mṟasa indi? Nochiowa tane mlungana? Tuke yapfo yechiaka cha modo?

⁴⁷ Kumbuowo chando inyi njilakeri o mlungana; ke mndu ulemuwumba nekekaa ko kiheri kifui!

⁴⁸ Nyi msoṟo o mbari njiki ekaa alewona opfu, echikuashuo mrima foke na owoko lo ko wapfu?

⁴⁹ Mndumii, nku wui wuoloru wulya wopfo wo kuwoka; kulewuliia nyamu Dawidi ko wuhendeli wopfo?”

⁵⁰ Ewo Mndumii, kyekumbuowo, chando waisalucho waṟundi wapfo; chando njikarishia kipeetenyi koko; maisalucho ha wandu wafoi.

⁵¹ Sa wakituwa wapfo waleisalucha, hoi Mndumii, ee da, waleisalucha njayo tsa mshimbuo opfo.

⁵² Kuichiko Mndumii mlungana! Ameni! Ameni!