SHIIMBO SHA DAWIDI 88 - Bibilia Kui Mdedie fo Kimochi

Kilio keterewa itaramo

(Kiimbo. Kiimbo kya Wakorahi. Ko Msongoru o waimbi: kui ofano lo Mahalathi Nealothi. Kiimbo kya Hemani Mwezrahi)

¹ Eewo Mndumii, Ruwa o okiṟo loko, mfiri na kio njilekufihiṟia oshangunyi lopfo.

² Shiterewo shako shishikie oshangunyi lopfo, udehie kudu kopfo kieṟeṟo kyako.

³ Kyamba mrima foko fuihutsu mawukiwa, na moo foko fushikie kufui na ko wapfu.

⁴ Njileitalio kambenyi lya iwo waisokia ṟungunyi; njilewa cha mndu alawode kitarama.

⁵ Njimkumbe kiidi kya iwo wapfiie, cha wai wawahe walee shipfunyi. Iwo iyo kulekewakumbuose, wawakumbe kuleshe na owoko lopfo.

⁶ Inyi kulenjilaṟa ṟungunyi lya wanda, handu kuwode meema kuṟungukie mnu.

⁷ Tuke yapfo ilenjilemia, kulenjituura kui masinanu hapfo hose.

⁸ Wanjiichi kulewaletsana na inyi; kulenjitana njisuike kowo; njilepfungo manya njechiidima iwukaho-pfo.

⁹ Riso lyako lilefafaa kipfa kya matuuro; Mndumii, njilekulaha orio mkonu; njilekuleshia Iyo mawoko hako.

¹⁰ Ngesa wapfu, nochiwawutia ṟiho? Ang'u walepfa wechihoṟoka wakuichimbiṟe?

¹¹ Woloru wopfo wochihambo ṟungunyi? Ang'u wuhendeli wopfo kiidi kya wunyamaṟinyi?

¹² Ṟiho tsapfo tsechimanyika memenyi? Ang'u wusumhanyi wopfo orukenyi lo wawahadime?

¹³ Kyaindi inyi ngakufihiṟia iyo, Mndumii, na ngamenyi shiterewo shako shechikushikia.

¹⁴ Mndumii, nkili uikumba mrima foko, konjiowishia kyamu kyapfo?

¹⁵ Njiliso wukiwa kya opfu wokia urika woko, njiletirisia shipangaṟa shapfo na iwuko nyi madima.

¹⁶ Nyashi tsapfo nlang'a tsileida huyako, shiowesha shapfo shikanjiarisa.

¹⁷ Shikantengetia cha mṟinga mfiri puti, shikanjipeṟehetsa shose handu hamu.

¹⁸ Mkunde na mbuya kowaletsana na inyi, na iwo wanjiichi wai memenyi.