SHIIMBO SHA DAWIDI 86 - Bibilia Kui Mdedie fo Kimochi

Iterewa itaramo

(Kiterewo kya Dawidi)

¹ Hoi Mndumii, kedeha kudu kopfo nonjiṟohuo, kipfa inyi nyi mkiwa na njiwuṟie.

² Keṟihika mrima foko, kyamba inyi njekeindia Ruwa, iyo ui Ruwa oko, kyekiṟa mṟundi opfo ichu ekyekukusiria.

³ Iyo, Mndumii, kyenjiṟihika, kyamba njikueṟeṟia Lyo mfiri puti.

⁴ Kechihiṟa mrima fo mṟundi opfo, kyamba njikuiria mrima foko nyo, Mndumii.

⁵ Kyamba Iyo, Mndumii Ui mcha, nokuṟeheṟie ihooṟia, noichuo osaṟio. Ko wandu wose wekyekulaha.

⁶ Ewo Mndumii, kyeadanyiawo shieṟeṟo shako, noicho ṟu lya shiterewo shako.

⁷ Mkonu fo kiwi kyako njechikulaha, kipfa nochinjiidikia.

⁸ Kiidi kya maruwa kuipfo cha iyopfo Mndumii, manya mawuto cha iho hapfo-pfo.

⁹ Wa mkambo wose kulewawika wechicha. Wechikuolokia Iyo, Mndumii, wechiichimbiṟa rina lyapfo.

¹⁰ Kyamba nyi iyo ui mnene, iyo nyio mowuta maṟihisho iyi iyo Ruwa kumonyi.

¹¹ Hoi Mndumii, njilosha njia yapfo; njechichumia kiidi kya kiilohi kyapfo; mrima foko fuchihiyo iindia rina lyapfo.

¹² Njechikuichika iyo, Mndumii, Ruwa oko, na mrima foko fose, njechiichimbiṟa rina lyapfo mlungana.

¹³ Kyamba njosaṟio tsapfo koko inyi tsifoi mnu; Kuleashuo mrima foko ko wapfu.

¹⁴ Hoi Ruwa, wawode utimbiri wainjiṟinjawia; Mamwingi fo wandu wawicho waishiha ngoo yako. Manya walakusongoṟe iyo, oshangunyi lo meso hawo.

¹⁵ Kyaindi Iyo, Mndumii, ui Ruwa o Osaṟio na wutonga, mtirisi, uichuo wuoloru na wukiilohi.

¹⁶ Kenjiembeṟukia na injisumba; keinenga mṟundi opfo pfinya tsapfo; noashuo mana o kisinga kyapfo kya kika.

¹⁷ Unjiwutie ofano lo wucha, sa wanjisuo waluwone na iṟeenze; kyamba iyo, Mndumii, kulenjitarama na injiwihiṟia moo.