SHIIMBO SHA DAWIDI 85 - Bibilia Kui Mdedie fo Kimochi

Iterewia mkambo mboṟa

(Ko Msongoru o waimbi: Kiimbo kya Wakorahi)

¹ Mndumii, kulechihio kya oruka lopfo, kulewihiṟa wapfungo wa shidenyi wa Yakobo.

² Kulehoṟia wuwicho wo wandu wapfo, kuleowisha wunyamaṟi wowo wose.

³ Kulewutaho tuke yapfo yose, kuletisiki koda wukari wo nyashi yapfo.

⁴ Ruwa o okiṟo lodu, kyeluwihiṟe, utirisie nyashi yapfo uwode kipfa kyadu.

⁵ Ngesa! Nochiluwutia nyashi mtano mlungana? Nochikaa na nyashiyo ko luwa na luwa?

⁶ Ngesa! Ukundi iwuya na iluṟutsa, wandu wapfo wachihio kipfa kyapfo?

⁷ Ewo Mndumii, kyeluloṟe isaṟia lyapfo noluinenge okiṟo lopfo.

⁸ Njiadanyia chando Mndumii-Ruwa aihamba, kyamba naiwia wandu wake ofoṟo. Ee-da na waheṟemtsu wake daa, indi walawuuye se wutondo.

⁹ Nkya lohi okiṟo loke lui hafui na walya wekyemwindia, kiṟumi kikae orukenyi lodu.

¹⁰ Osaṟio na kilohi shasumhanana, wusumhanyi na ofoṟo shikahekiana momu.

¹¹ Kiilohi kileoṟa wuyanenyi, wusumhanyi wukaimehia kuwuka ruwehu.

¹² Ee da, Mndumii nechilekia ikyo kii kicha, na oruka lodu lukumbie shilimu shalo.

¹³ Wusumhanyi wochisonguo mbele yake, nawo wochihaluo njayo tsafo tsiwe njia.