SHIIMBO SHA DAWIDI 83 - Bibilia Kui Mdedie fo Kimochi

Kiterewo kipfa kya wakituwa wa Israeli

(Kiimbo kya Asafu. Kiimbo)

¹ Ewo Ruwa, kulakyesekye! Ewo Ruwa, kulatsie sau, manya kulaonyonyie!

² Kyamba wakituwa wapfo waiwika kitohio, na iwo wakusuo wairie mdo yawo.

³ Huye ya wandu wapfo waiwika mtambo; waichila kya iwo uwaowishie.

⁴ Wahamba, kenjonyi luwaarisie kuleshe walawe mkambo, na rina lya Israeli lyechisendosepfo.

⁵ Kyamba waichila na ngoo imu, kipfa kyapfo waiwikiana kyasa.

⁶ Ihema lya Edomu, na Waismaeli na Moabu, na Wahagari,

⁷ Gebali, na Amonyi na Ameleki na Filisti, na iwo wekyekaa Tiro,

⁸ Ashuri nao naidikyanyi nawo, waletarama wana walya wa Loti.

⁹ Kewawutie cha Midianyi, na cha Sisera, cha Yabini, kulya kimedenyi kya Kishoni.

¹⁰ Sa walekombetsio Endori. Wakawa kyala orukenyi.

¹¹ Notanyie wanene wawo cha Orebu na Zeebu, na Masheki wawo wose cha Zeba na Zalmna.

¹² Sa walehamba, luchilie handu ha Ruwa.

¹³ Ewo Ruwa, watane cha kilulyi kya kiwiṟi, cha muulu kiidi kya otanu.

¹⁴ Cha modo fokombetsa ngeṟa; cha olewo lo modo fuiatso mafumvunyi.

¹⁵ Nyi wudo ochiwalatia kui kiwiṟi kyapfo, na iwakangaṟitsa kui owira lopfo.

¹⁶ Ichuṟa shamu shawo iṟeenze; wawalie rina lyapfo, Mndumii.

¹⁷ Waṟeenze, waneneukye mlungana, ee da, wawuṟiwuṟi na ideka.

¹⁸ Wamanye ke iyo, okelaho rina lyapfo Mndumii-Ruwa, nyi iyo kumonyi ui huye, huye ya wuyana wose.