SHIIMBO SHA DAWIDI 80 - Bibilia Kui Mdedie fo Kimochi

Iterewa kipfa kya mkambo

(Ko Msongoru o waimbi: ofano lo Yungiyungi. Kiimbo kya Asafu)

¹ Iyo okelisiṟa Israeli, adanyia, iyo oketeteṟa Yosefu cha ipo, iyo odamie huye ya makyerubi, waa sa.

² Oshangunyi lo Efraimu, na Benyameni, na Manase, noamtse pfinya tsapfo; uche, ulukiṟe.

³ Ewo Ruwa, noluwihiṟe, nowaṟe kyamu kyapfo naso lochikia.

⁴ Ewo Mndumii, Ruwa menyi matorito, mrasa indi? Ochipufukia shiterewo sha wandu wapfo?

⁵ Kulewainenga mkate fo mchenyeṟe, kulewarutsa mchenyeṟe kui kihesho king'anyi.

⁶ Nolutewa lukawa kiloyo ko wa mṟasa wadu, na wakituwa wadu waiseka wo wenyi ko wenyi.

⁷ Hoi Ruwa menyi matorito kyeluwihiṟe; nowaṟe kyamu kyapfo naso lochikia.

⁸ Kuleende msabibu kuwuka Misri, kofuna wa mkambo kofudonga.

⁹ Koachikia mwanya mbele yake, nafo fukaala mri ifoi fukaichuṟa oruka.

¹⁰ Mafumvu hakashikio nyi maria hafo; maṟamba hafo nyi cha mieresi ya Ruwa.

¹¹ Nafo fulelandaṟa maṟamba hafo mṟasa ipalyipalyinyi, na njana tsafo tane kundo kuwode Meda.

¹² Nki ili kulewunduo njomombo tsake? Wakahaa wose weida njia?

¹³ Nguwe tsa ngeṟenyi tsikafunyamaṟa; na mando ha nja hakafudafuna.

¹⁴ Hoi Ruwa menyi matorito lokuterewa, wuya, noambuye kuwuka huye uwone, nocheye msabibufu.

¹⁵ Na njana iya kuleidonga, kui owoko lopfo lo kulyo; na iṟamba lilya kulelyiwika, lyikawa lyikahari kui mrima fopfo.

¹⁶ Fulekoṟo na modo; fulemanyo; kui wusutsu wo kyamu kyapfo wadeke.

¹⁷ Owoko lopfo lo kulyo lukae huyake, icho ulemsambuṟa kipfa kyapfo.

¹⁸ Nahong'u lochikulekia luwuye na numapfo; kyeluṟamtse naso lochiindia rina lyapfo.

¹⁹ Hoi Mndumii, Ruwa menyi matorito, kyeluwihiṟe, nowaṟe kyamu kyapfo naso lochikia.