SHIIMBO SHA DAWIDI 78 - Bibilia Kui Mdedie fo Kimochi

Ruwa na wandu wake

(Kiimbo kya Asafu)

¹ Lanye wandu wako, adanyienyi iwawaso lyako, dehenyi madu kya madedo ha dumbu lyako.

² Njipfunguo dumbu lyako kui shihano, njisende mfanano ya kacha.

³ Mbonyi luletsiicho na itsimanya; sa waku wadu waleluwia.

⁴ Itso lochitsiṟika wana wawopfo, kunu lochiwia luwa lyingi, kiṟumi kya Mndumii, na pfinya tsake; na mbonyi tsake tsa kiṟiha aletsiwuta.

⁵ Kyamba nalewanza kiṟingishio ko Yakobo, na iwawaso kalyiwika ko Israeli, sa awewawasie waku wadu wamanyishie wana wawo.

⁶ Kundu luwa lyingi lyimanye mbonyitso; nyiwo wana wo wechifeo, wahoṟoke na iongoya wana wawo.

⁷ Wawikie Ruwa kikusirio kyawo. Manya walechihadima mawuto ha Ruwa, Kyaindi wawade mawawaso hake.

⁸ Ee-da, walawe cha wandee wawo, kishari kya mtoolo na wutimbiri, kishari kilekekusungusia mrimenyi, manya mrimenyi foke fulawei lohi ko Ruwa.

⁹ Waefraimu walya, wenyi shisha, wekapa uda, walewuya na numa mfiri fo shida.

¹⁰ Walewada mkundana fo Ruwapfo; nakaleha ihendelia iwawaso lyake;

¹¹ Wakahadima mawuto hake, na mbonyi tsake tsa kiṟiha alewaloṟa.

¹² Oshangunyi lo wande wawo alewuta mbonyi tsa ṟiho; orukenyi lo Misiri, pichinyi lya Soani.

¹³ Naledumbutsana ipalyipalyi kawaambatsa; nalehoṟotsa mṟinga cha sohu.

¹⁴ Kawateteṟa mfiri kui ipuchi, na kio taṟaṟaa kui ngeela ya modo.

¹⁵ Nalepaṟa maṟaṟa ha maho nuka, kawarutsa mṟinga fufoi cha mṟinga fo ipalyipalyinyi.

¹⁶ Kaweendie shimeda mahonyi hang'anyi, kasotsa mṟinga cha meeda.

¹⁷ Kyaindi wakaengeṟa imbutia wunyamaṟi; ili walepiṟa ai huye kulya orukenyi lulawode mṟinga.

¹⁸ Wakahesha Ruwa mrimenyi yawo, kui ikunda kelya kui lango tsawo.

¹⁹ Ee-da walededa wokaṟuo Ruwa, wakahamba, “Ngesa! Ruwa nechiidima iluṟeheṟia shelya nuka?

²⁰ Ambuya, nalekapa iṟaṟa; mṟinga fukasoka, meda ikaeka. Nechiidima daa iluinenga shelya? Nechiṟeheṟia wandu wake nyama?”

²¹ Ili Mndumii aleicho nalesungulula; Yakobo kaatsio modo, nyashi nayo ikado kipfa kya Israeli.

²² Kipfa walaleidikia Ruwa, manya walakikusirie okiṟo loke.

²³ Kyaindi nalewawasa mapuchi ha huye; kapfunguo shiṟoṟi sha ruwehu.

²⁴ Kawaolotsia mana kundu walye; kawainenga mso fo ruwehu.

²⁵ Mndu o wandu kalya kelya kya wai ngohoda; nalewadikia kelya kewaihutsa.

²⁶ Naleembeṟutsia otanu lo ora lo ngamenyi ruwehu; kateteṟa ora lo nuka kui wuidimi woke.

²⁷ Kawaletsia nyama cha kiluli, na shilehe shiwode makungo; cha msanga fo ipalyipalyinyi.

²⁸ Kashiolotsa ipfo kundu shekelaa, njora tsose tsa handu shekakaa.

²⁹ Wakalya wakaihuda pacha; kipfa nalewaendie shilya wawelangie.

³⁰ Ma chandu kelya kiwei madumbunyi hawo, walelekana na lango tsawopfo.

³¹ Nyashi ya Ruwa ikawachea huye yawo; kawaha walya wawei wanoru; kawaolotsa wanda wanake wa Israeli.

³² Hamu na ikyo wakaengeṟa iwuta wunyamaṟi; manya walaidikie mawuto halya hake ha ṟiho.

³³ Ko ikyo nalefuiṟa mfiri iya yawo cha mumuyo, na maaka yawo kui ngapo tsa oweṟe.

³⁴ Lyilya alewawaha nylondi waweimshiha; wakawuya wakashiha Ruwa na pfinya.

³⁵ Wakakumbuo ke Ruwa nyi iṟaṟa lyawo, na Ruwa o huye nyi mkiṟa owo.

³⁶ Indi walemlemba kui madumbu hawo, wakambia wongo kui njolimi tsawo.

³⁷ Kyamba ngoo tsawo tsiwei sumhana naopfo; ma wawei wahendeli sumhana na mkundana fokepfo.

³⁸ Kyaindi O; kyamba nawode osaṟio, nekehoṟia wuwicho manya ekerumatsapfo. Kafoi nekeatsiṟia nyashi yake kuleshe; manya ekeamtsa nyashi yake yosepfo.

³⁹ Kakumbuo ke wo wai mbihu, Otanu luiida manya lulaiwuya.

⁴⁰ Walempiṟa kulya nuka ka kyenga? Na imwendie fowa kulya nuka.

⁴¹ Wakawuya na numa wakaheshase Ruwa; wakasuiṟa mnene mwele o Israeli.

⁴² Walekumbuo owoko lokepfo, ma mfiri fulya alewaashuo ko mtuuripfo.

⁴³ Chandu alewika shichano shake kulya Misiri, na ṟiho tsake kulya pichinyi lya Soani.

⁴⁴ Nalehaluo meda yawo samu, na shimeda walaidime inyo.

⁴⁵ Kawadikia manzi hakawalya, na ngele tsikawanyamaṟa.

⁴⁶ Shilimu shawo kashiinengia ohonjo, na nzihe iṟunda lyawo.

⁴⁷ Kanyamaṟa msabibu yawo kui mvuo ya manzaho, na mkuyu yawo kui mṟinga fo mbeo ya mtsudu.

⁴⁸ Kalekia mmbe tsawo tsikapo mvuo ya manzaho, na mapo hawo nyi makuṟuṟuma.

⁴⁹ Kawadikia wulang'a wo nyashi yake, tuke na wukiwa na mawawio, wamalaika sa wafoi wekeende mawicho.

⁵⁰ Kateseheṟia nyashi yake njia; Manya aleashuo mrima yawo na opfupfo, indi naledeeya moo yawo ndaṟe.

⁵¹ Kakapa orio kiwee kya Misri; wa kuwoka wa pfinya tsawo ihemenyi lya Hamu.

⁵² Indi naleteteṟa wandu wake cha machondi, kawalisiṟa cha ipo kulya nuka.

⁵³ Iwo kawaduo kipuo manya walaowuo, kyaindi ipalyipalyi lilepfinyikia wakituwa wawo.

⁵⁴ Kawaduo tane mṟasenyi foke mwele, fumvu alelyihuṟa kui owoko loke lo kulyo.

⁵⁵ Kafuna mkambo mhenu oshangunyi lowo, kawaheshia kyoṟa na mrewa, kadamiṟa mbaṟi tsa Waisraeli mahemenyi hawo.

⁵⁶ Kyaindi walehesha Ruwa ai huye, wakalekana nao; manya walewada shiṟingishio shakepfo.

⁵⁷ Indi walewuya na numa, wakatehia cha wandeawo; wakakudoweka cha uda wunyamaṟikie.

⁵⁸ Wakamdosa nyashi kya ikudosa lyawo, wakamtewa kawado nyi wunyenyi kui mfanano yawo.

⁵⁹ Ruwa kaicho, karihinyika, kaleha Israeli nakamu.

⁶⁰ Kada kikunyi kya Shilo, ihema alelyiwika makidi hawi ha wandu;

⁶¹ Kalekia pfinya tsake tsikadao, na wulole woke mawokonyi ha mtuuri.

⁶² Kalekia wandu wake wakapo na oshu; kapufukia kyoṟa kyake.

⁶³ Modo fukokombetsa wanake wawo, wana wawo wa kika walaimbio shiimbo sha walyi.

⁶⁴ Wakohanyi wawo wakaolotso nyi oshu, manya wakusu wawo walakuidie.

⁶⁵ Lyondi Mndumii alekure cha ili awelee madonyi; cha ngohoda aikoṟoṟoma kipfa kya mvinyo;

⁶⁶ Kakapa waturi wake kawawihiṟa na numa; kawainenga iṟeenze kiheri kyose.

⁶⁷ Indi naleleha ihema lya Yosefu; manya nalasambuṟe kishari kya Efraimu.

⁶⁸ Kyaindi nalesambuṟa kishari kya Yuda, fumvu lya Sioni nalelikunda.

⁶⁹ Kawika haele hake cha shitoṟomoso kikoyo; cha wuyana alewuwika kawuikara mlungana.

⁷⁰ Kasambuṟa Dawidi, mṟundi oke; kamuwuta kiidi kya mfiṟiha ya machondi.

⁷¹ Numa ya machondi haionza nalemiirapfo, nalisiṟe Yakobo wandu wake, na Israeli mokyoṟa oke.

⁷² Kawalisa kui wuhoṟotsu wo mrima foke, kawateteṟa ko wuaria wo mawoko hake.