SHIIMBO SHA DAWIDI 74 - Bibilia Kui Mdedie fo Kimochi

Kifihiṟo kipfa kyaiwunduyo hekalu

(Kiimbo kya Asafu)

¹ Hoi Ruwa, nkili ulelukumba mlungana? Nkili nyashi yapfo idutsa mtsu, Huye ya machondi ha kilisionyi kyapfo?

² Kumbuo kisanzyo kyapfo, ulewahuṟa kuwoka, ulewakiṟa kundu wawe mkambo fo kioṟa kyapfo, fumvu lya Sioni nyi ulelitana kanyi kapfo.

³ Iriaho madende hapfo nowone chandu kulenyamaṟika piu; wakituwa walewutia orio wuwicho handu hapfo haele.

⁴ Watuuri wapfo wapoṟohoṟa kiidi kya kisanzio kyapfo kiele, wawikie bendeṟa tsawo tsiwe kitaanyo.

⁵ Wafananyi na wandu waiira masoka, wamanye mashidi ngeṟenyi.

⁶ Na wulalu wucha wulya wose piu wodeka, wapaṟapaṟa mongo ya na masoka na shiria-da.

⁷ Wakakoṟa modo halya haele hapfo; wakafanyitsa ngafu kifumbi kyapfo na rina lyapfo.

⁸ Wakahamba mrimenyi yawo, luwarumatse nakamu; handu wandu wakuwumbie kipfa Ruwa, wahakoṟa na modo iya orukenyi.

⁹ Luwonyi maṟiho hadu-pfo, ma wulalu kuwode mwikimbipfo, manya kodu kuwode aichipfo, mṟasa indii?

¹⁰ Hoi Ruwa, mtuuri nechinjiseṟema mṟasa indi? Mkituwa nechimina rina lyapfo mtano indii?

¹¹ Nkili uwihiṟa owoko lopfo, ee, owoko lopfo lo kulyo, uluute oo kipetehu kyapfo, uwarumatse nakamu.

¹² Kake Ruwa nyi mangi yako wokia kacha, ekewuta mbonyi tsekiṟa kiidi kya oruka.

¹³ Iyo nyi ulehawa ipalyipalyi kui pfinya tsapfo, nyi ulepaṟa mdo ya makunga halya hang'anyi hose kiidi kya mṟinga.

¹⁴ Iyo nyi ulesa mdo fo Lewiathani; fuwe kelya kya wandu wa mbai ya ipalyipalyi.

¹⁵ Iyo kuleende soka na shimeda; Iyo koumiṟa meda iwewode mṟinga kiheri kyose.

¹⁶ Mfiri nyi fopfo, kio naawo, yi Iyo kulewika sa na mnengeṟi.

¹⁷ Iyo kulewika mṟasa yose ya oruka, mtsudu na nuka nyi iyo kulewika.

¹⁸ Hoi Mndumii, ukumbuo isho, mkituwa nairuma, wandu watondo walemina rina lyapfo.

¹⁹ Ulainenge indo lilang'a moo fo mbeta yapfo; ulahadime mlungana moo ya wandu walya wapfo walemino.

²⁰ Kusaṟe kyaasa; kipfa handu kuwode meema kiidi kya oruka-le; kuichuo wuneesi wulechiwa ihamba.

²¹ Mmine nalawuye awodo nsonu, mkiwa na ulya awuṟie waṟumishe rina lyapfo.

²² Hoi Ruwa, uhoṟoke, udede kyapfo kumonyi, ukumbuo chando okerumo nyi tondo mfiri puti.

²³ Ulahadime ṟu lya watuuri wapfo; kituṟu kyawo kicha huyapfo orio kiheri.