SHIIMBO SHA DAWIDI 73 - Bibilia Kui Mdedie fo Kimochi

KITAPU KYA KAṞAṞU Wulohi wochiikolonyia

¹ Lohi Ruwa naimcha ko Israeli, ko iwo wai wailyi mrima.

² Kudende koko kuwei kufui na irendemka, ndifo tsako tsiwei kufui na irendia.

³ Kipfa njilewado wunenyi ko walya wekekushela, kiheri njilewona ofoṟo ko walai na wusumhanyi.

⁴ Kyamba Wawode mawawio ipfo kiidi kya opfu lowo-pfo, na mbihu fowo fuwode pfinya.

⁵ Wukiwenyi wo wandu wengi wo waipfo-pfo, manya wawode ngapo hamu na wandu-pfo.

⁶ Orikiki lui shilukuta nzingonyi kowo, ikudosa likawa cha nguwo.

⁷ Watuluo meso cha indo inoru, waitola kota, ipfo mahionyi hawo.

⁸ Wetaluo, weonguo mawicho, wededa sha mkika cha ili wai huye.

⁹ Wawikie dumbu lyawo ruwehu, na olimi lowo luiṟaha ṟaha wuyanenyi.

¹⁰ Koikyo wandu wahalukiye ipfo, waambia orio kindo wawio.

¹¹ Wo wekehamba, Ruwa naichi ada? Ngesa! Kuwode wuṟango ko ichu ai huye?

¹² Manyang'u, nyi wudo wai walai na wusumhanyi, na kui ikeseka mkonu yose wawode masaa hafoi.

¹³ Lohi njilesanja mrima foko naifuilisha wulya, ngasanja mawoko hako ndawutie kiwicho.

¹⁴ Kyamba njilekapo mfiri puti, na iliso wukiwa orio ngamenyi.

¹⁵ Kima njilehamba, njechionguo isho, ate! Njiwechilemba kishari kya wana wapfo.

¹⁶ Inyi njilekusaṟa chando njemanya isho; kikawuya iwa kyumu mesonyi hako;

¹⁷ Lyamandi njileida na kwele ko Ruwa,

¹⁸ Ngaambuya mtsitsionyi foke. Nokewaolotsa mṟasa alya hanyamaṟikie.

¹⁹ Nyi uda wawa wukiwa oweṟe! Wadekia na idetso nyi ikangaṟitso.

²⁰ Hoi Mndumii, cha ndodo kiheri kyekure, kokure nochimina sanamu yawo.

²¹ Mrima foko kiheri fulewona mawawio; kitsi kyako kikatocha.

²² Njilewa cha isembo, njilaichi idedo; njiwei cha indo oshangunyi lopfo.

²³ Indi inyi njii na iyo kiheri kyose, nonjiwode na kuwoko kopfo ko kulyo.

²⁴ Nochinjisongoya ko mbonyi tsapfo, ifurumia nonjiambiye na kiṟumi.

²⁵ Nyiu njimbode ruwehu, ma wuyana njiwode monjichihiṟa cha iyo pfo.

²⁶ Mbihu foko na mrima foko shitutia, kyaindi Mndumii-Ruwa nyi iṟaṟa lya mrima foko; na kyenga kyako mlungana.

²⁷ Kipfa welekana na iyo wechideka; nyi kulerumatsa wose walekuda Iyo.

²⁸ Ikaa kufui na Ruwa kinjichihiṟie mnu, ngahaluo ko Mndumii-Ruwa handu hedichia, njionguo mawuto hapfo hose.