SHIIMBO SHA DAWIDI 72 - Bibilia Kui Mdedie fo Kimochi

Iterewia mangi

(Kiimbo kya Solomoni)

¹ Hoi Ruwa, inenga mangi mwaanduye fopfo, na mana o mangi wusumhanyi wopfo.

² Nechianduya wandu wapfo kui sumhana, na walya wapfo walewonyio ipfo mwanduyenyi.

³ Mafumvu hechifeeye wandu ofoṟo, na shitoṟomoso wusumhanyi.

⁴ Nechianduo kya walya walewonyio nyi wengi, nechikiṟa wahuṟi, nechipoṟipotsa ichu mowonyia.

⁵ Wechikuowuo kiheri kyose kya mnengeṟi, Na kiheri meri fulee nja mlungana na mlungana.

⁶ Nechisoka cha mvuo huya maṟa matupure, cha ṟauṟa ya kio yenosa oruka.

⁷ Mfiri ya mndu o wusumhanyi, yechiengeṟo, na ofoṟo sa lung'anyi mṟasa mtsitsionyi fo meri.

⁸ Nawade wuitoṟi wokia ipalyipalyi mṟasa ipalyipalyi, Wokia meda mṟasa mtsitsionyi fo oruka.

⁹ Wekaa kundo ko olele wapfire-ndi oshangunyi loke, wakituwa wake wakombe kiluli.

¹⁰ Wamangi wa Tarshishi na njoruka tsii mṟingenyi, tsitae okamba, wamangi wa Seba na Sheba walekie shiinengo.

¹¹ Ee Wamangi wose wamwiindie, na mkambo ya wandu wose wamṟundie.

¹² Kipfa nechiṟa ulya awuṟie ili aimlaha, na mndu mmbonye kokoya alawode mtarami.

¹³ Nyechisaṟia ulya mfafa na mkiwa, na mrima ya wandu wawuṟie nechiikiṟa.

¹⁴ Nechikiṟa moo ya wandu waiwawonyie na wukika, na samu yawo nyi ya wuhuru oshangunyi loke.

¹⁵ Nahong'u nakae na moo, wamnenge sahabu ya Sheba, wamterewie kitsitsi; na imbikia ona mfiri puti.

¹⁶ Kuwade mboṟa ya mso fufoi, mademehu hai fumvuhu, ndunda tsaho tsifo cha tsa Lebanoni, Na wandu wa mṟinyi waleheke cha maṟa ha orukenyi.

¹⁷ Rina lyake likae mlungana, mandi mnengeṟi fowaa, rina lyake liwade kishari; wandu wose wahende ikuwikia ona; na imlaha nanga.

¹⁸ Kuichiko Mndumii, Ruwa, Ruwa o Israeli, akewuta maṟiho o amonyi.

¹⁹ Rina lyake inene lichiko mlungana, wuyana wose wuichuo wuitoṟi woke. Ameni na Ameni.

²⁰ Shiterewo sha Dawidi mana o Yese shasia.