SHIIMBO SHA DAWIDI 71 - Bibilia Kui Mdedie fo Kimochi

Ruwa nyi kikusiriyo kya wameku

¹ Ngakudichia iyo, Mndumii; njilasuke mlungana.

² Kui wulohi wopfo unjichiṟe, unjikiṟe, unjidehie kudu kopfo, unjikiṟe.

³ Uwe koko iṟaṟa na kanyi koko, kundu njechikuhendya mkonu yose. Kulewawasa njikiṟo, iyo nyi opanga loko na omombo loko.

⁴ Hoi Ruwa oko, njiashuo owokonyi lo menyi mtambo, kiidi kya owoko loke ichu ai mbicho, modeka,

⁵ Kipfa nyi iyo njikusihie, Hoi Mndumii-Ruwa, kikusiryo kyako kuwokia ukoho woko.

⁶ Nyikopfo njikusirie wokia ifeo lyako, nyi iyo ulenjiwuta wusunyi wo wama oko, njikuṟumisha Iyo mlungana.

⁷ Ngawa kiṟihisho ko wandu wafoi, na iyo nyi kidichio kyako kya pfinya.

⁸ Dumbu lyako lyechiichuṟo kiṟumi kyapfo; na wuitoṟi wopfo mfiri puti.

⁹ Ulanjikumbe kiheri kya wuku, pfinya tsako tsikasia ulanjide.

¹⁰ Kipfa wakituwa wako wakeri injiwia, na iwa waaliye moo foko wawesana.

¹¹ Wechihamba, Ruwa namda, mlatienyi, mbadenyi, kuwode momkiṟa-pfo.

¹² Hoi Ruwa, kulakae haleshe na inyi, hoi Ruwa oko, kambiṟa injitarama.

¹³ Wasutso, wadekedeke, wakituwa wa mrima foko; waṟiko sonu na wusutsu iwa wanjikundia mawicho.

¹⁴ Inyi njikusiria maheri hose, njechiengeṟa kiṟumi kyapfo kyose.

¹⁵ Dumbu lyako lyechionguo wulohi na okiṟo lopfo; mfiri puti; kipfa ndaichi itala lyake.

¹⁶ Njechicha na mbonyi tsa ṟiho tsa Mndumii-Ruwa; njechikumbuṟa wandu wulohi wopfo iyo kumonyi.

¹⁷ Hoi Ruwa, ulenjilosha woka mbei mkoho; njiwekeambuya maṟiho hapfo shika inu.

¹⁸ Manya ngakuo ngawada mhasa, hoi Ruwa, ulanjide. Mṟasa njiwie wandu wa rikalyi pfinya tsapfo, na orio mocha wuidimi wopfo.

¹⁹ Na wusumhanyi wopfo, hoi Ruwa ui huye mnu. Iyo ulewuta mbonyi njinene, hoi Ruwa, nyiu ai cha Iyo?

²⁰ Iyo, uleluloṟa matuuro mawicho, hafoi, nochiluwihiṟia-se moo. Nochiluirya-se huye, kuwokia wanda terinyi.

²¹ Samanya ilasonguo; nowenjiengeṟia wunene! Wuya-se na injiwihiṟia moo.

²² Na Inyi njechikuana na kinanda, na wulohi wopfo, Hoi Ruwa oko. Njechikuimbiya na kinanda kya ndusu, Iyo Mwele o Israeli.

²³ Dumbu lyako lyechichihiyo mnu kiheri njikuimbia, Na mrima foko ulefukiṟa.

²⁴ Olimi loko lochionguo Wusumhanyi wopfo mfiri puti Kipfa nyi wai wasutse, Walesonu, wose wawenjiangye mawicho.